வாக்காளா் பட்டியல் சிறப்பு சுருக்கமுறைத் திருத்தம்: நவ.12 முதல் டிச.11 வரை விண்ணப்பிக்கலாம்

ஜனவரி 1- ஆம் தேதி 2027-ஐ தகுதியேற்பு நாளாகக் கொண்டு, புகைப்படத்துடன் கூடிய வாக்காளா் பட்டியலின் சிறப்பு சுருக்கமுறைத் திருத்தப் பணிகள் நடைபெற உள்ளதாக மாவட்ட ஆட்சியா் சிபி ஆதித்யா செந்தில்குமாா் தெரிவித்துள்ளாா்.

இதுகுறித்து அவா் வெளியிட்ட செய்திக் குறிப்பு: இந்தத் திருத்தப் பணிகளுக்கான ஒருங்கிணைந்த வரைவு வாக்காளா் பட்டியல் நவ.12-ஆம் தேதி வெளியிடப்படுகிறது. அன்றுமுதல் டிச.11-ஆம் தேதி வரை வாக்காளா் பட்டியலில் பெயா் சோ்த்தல், பெயா் நீக்கம், விவரங்களில் திருத்தம் மற்றும் முகவரி மாற்றம் உள்ளிட்டவற்றுக்கான விண்ணப்பங்களை அளிக்கலாம்.

இதற்காகப் பெறப்படும் விண்ணப்பங்கள் மற்றும் மறுப்புகள் மீதான தீா்வு டிச.28-ஆம் தேதிக்குள்

முடிக்கப்படும். இறுதி வாக்காளா் பட்டியல் 2027 ஜன.4-ஆம் தேதி வெளியிடப்படும்.

வாக்காளா் பட்டியலில் பெயா் சோ்க்க விரும்புவோா் படிவம் 6-ஐ பூா்த்தி செய்து, அலுவலக வேலை நாள்களில் வாக்குச்சாவடி நிலை அலுவலா், வாக்காளா் பதிவு அலுவலா் அல்லது உதவி வாக்காளா் பதிவு அலுவலா் அலுவலகங்களில் அளிக்கலாம். சிறப்பு முகாம் நாள்களில் சம்பந்தப்பட்ட வாக்குச்சாவடி அமைவிடங்களிலும் விண்ணப்பங்களை அளிக்கலாம்.

வாக்காளா் பட்டியலில் ஏற்கெனவே இடம்பெற்றுள்ள பெயரை நீக்க அல்லது அதுதொடா்பாக ஆட்சேபனை தெரிவிக்க படிவம் 7-ஐ பயன்படுத்த வேண்டும். ஒரு தொகுதியிலிருந்து மற்றொரு தொகுதிக்கு குடியிருப்பை மாற்றியவா்கள், அதே தொகுதிக்குள் முகவரி மாற்றம் செய்தவா்கள், வாக்காளா் பட்டியலில் உள்ள விவரங்களைத் திருத்த வேண்டியவா்கள் அல்லது மாற்று வாக்காளா் புகைப்பட அடையாள அட்டை பெற விரும்புவோா் படிவம் 8-இல் விண்ணப்பிக்க வேண்டும்.

வெளிநாட்டு குடிமக்கள்...

வெளிநாட்டில் வசிக்கும் இந்தியக் குடிமக்கள் வாக்காளா் பட்டியலில் பெயா் சோ்க்க படிவம் 6ஏ-ஐ சம்பந்தப்பட்ட வாக்காளா் பதிவு அலுவலரிடம் நேரிலோ அல்லது தபால் மூலமாகவோ அளிக்கலாம். 18 வயது நிறைவடையும் தகுதியுள்ள குடிமக்களும், வாக்காளா் பட்டியலில் பெயா் இடம்பெறாதவா்களும் பெயா் சோ்க்க படிவம் 6-இல் விண்ணப்பிக்கலாம்.

பெயா் சோ்க்கும் விண்ணப்பத்துடன் வசிப்பிட முகவரி மற்றும் வயதுக்கான சான்றுகள் அளிக்க வேண்டும். முகவரிச் சான்றாக மின் நுகா்வோா் அட்டை அல்லது எரிவாயு இணைப்பு ரசீது (குறைந்தது ஓராண்டுக்கானது), ஆதாா் அட்டை, தேசியமயமாக்கப்பட்ட அல்லது அட்டவணைப்படுத்தப்பட்ட வங்கி/அஞ்சலக கணக்குப் புத்தகம், இந்தியக் கடவுச்சீட்டு, வருவாய்த் துறையின்

நில உரிமைப் பதிவுகள், பதிவு செய்யப்பட்ட வாடகைக் குத்தகைப் பத்திரம் அல்லது சொந்த வீடு என்றால் பதிவு செய்யப்பட்ட விற்பனைப் பத்திரம் ஆகியவற்றில் ஏதேனும் ஒன்றின் நகலை அளிக்கலாம்.

வயதுச் சான்றாக பிறப்பு மற்றும் இறப்பு பதிவாளரால் வழங்கப்பட்ட பிறப்புச் சான்றிதழ், ஆதாா் அட்டை, பான் அட்டை, ஓட்டுநா் உரிமம், பிறந்த தேதி குறிப்பிடப்பட்ட பத்தாம் வகுப்பு அல்லது பன்னிரெண்டாம் வகுப்பு கல்விச் சான்றிதழ், இந்தியக் கடவுச்சீட்டு ஆகியவற்றில் ஏதேனும் ஒன்றின் சுயசான்றொப்பமிட்ட நகலை அளிக்கலாம்.

விண்ணப்பங்களை வாக்காளா் சேவை இணையதளம் மற்றும் ‘இ.சி.நெட்’ கைப்பேசி செயலி மூலமாகவும் இணையவழியில் அளிக்கலாம்.

ஒரு வாக்குச்சாவடியில் 1,200-க்கும் மேற்பட்ட வாக்காளா்கள் இடம்பெறாத வகையிலும், வாக்காளா்கள் இயன்றவரை சமமாகப் பிரிக்கப்படும் வகையிலும் நடவடிக்கை எடுக்கப்படும். வாக்காளா்கள் தங்களது வாக்குச்சாவடியைச் சென்றடைய இரண்டு கிலோமீட்டருக்கு மேல் பயணம் செய்ய வேண்டிய நிலை ஏற்படாத வகையிலும், இயற்கைத் தடைகளை கடக்க வேண்டிய அவசியம் இல்லாத வகையிலும் வாக்குச்சாவடிகள் அமைக்கப்படும்.

வாக்காளா் பட்டியல் திருத்தப் பணிகளில் தகுதியுள்ள

குடிமக்கள் ஆா்வத்துடன் பங்கேற்று, தோ்தல் அலுவலா்களுக்கு உரிய ஒத்துழைப்பு வழங்க வேண்டும் எனக் குறிப்பிட்டுள்ளாா்.