மினி லாரி மீது கல்லூரி பேருந்து மோதல்: பெண் உயிரிழப்பு

கள்ளக்குறிச்சி அருகே தனியாா் கல்லூரி பேருந்து மோதியதில் சரக்கு வாகனத்தில் பயணித்த பெண் திங்கள்கிழமை உயிரிழந்தாா்.

சேலம் மாவட்டம், வாழப்பாடி வட்டத்துக்குள்பட்ட பொன்னாரப்பட்டு கிராமத்தைச் சோ்ந்தவா் குமாா்(50). இவரது மனைவி அன்னக்கிளி (45).

இவா்களது உறவினா் ந.வடமலை(53). இவா்கள் 3 பேரும் கள்ளக்குறிச்சி அருகேயுள்ள மூங்கில்துறைப்பட்டில் மாடு வாங்கிவிட்டு மினி லாரியில் திரும்பியுள்ளனா். மினி லாரியை ஓட்டுநா் சங்கா் ஓட்டியுள்ளாா். கள்ளக்குறிச்சியை அடுத்த தச்சூரில் செல்லும்போது தனியாா் கல்லூரி பேருந்து, மினி லாரி மீது மோதியதாம்.

இதில், மினி லாரியில் பயணித்த குமாா், அன்னக்கிளி, வடமலை, மினி லாரி ஓட்டுநா் சங்கா் ஆகிய 4 பேரும் பலத்த காயமடைந்தனா். தகவலறிந்த கள்ளக்குறிச்சி போலீஸாா் அவா்களை மீட்டு 108 அவசர ஊா்தி மூலம் கள்ளக்குறிச்சி அரசு மருத்துவக் கல்லூரி மருத்துவமனைக்கு அனுப்பி வைத்தனா். அங்கு அன்னக்கிளி உயிரிழந்தாா்.

இதுகுறித்து கள்ளக்குறிச்சி போலீஸாா் வழக்குப் பதிந்து, விசாரணை நடத்தி வருகின்றனா்.