எம்ஜிஆர் சிலைக்கு கட்சியினர் மரியாதை

தமிழக முன்னாள் முதல்வர் எம்ஜிஆரின் நினைவு தினத்தையொட்டி, புதுச்சேரியில் உள்ள அவரது சிலைக்கு பல்வேறு கட்சியினர் திங்கள்கிழமை மாலை அணிவித்து மரியாதை செலுத்தினர்.
புதுவை அரசு சார்பில் புதிய பேருந்து நிலையம் அருகே உள்ள எம்ஜிஆரின் சிலைக்கு முதல்வர் வே. நாராயணசாமி, அமைச்சர் கந்தசாமி ஆகியோர் மாலை அணிவித்து மரியாதை செலுத்தினர்.
அதிமுக சார்பில் மாநிலச் செயலாளர் புருஷோத்தமன் தலைமையில் கோகுலகிருஷ்ணன் எம்.பி., எம்எல்ஏக்கள் அன்பழகன், வையாபுரி மணிகண்டன், பாஸ்கரன் உள்ளிட்டோர் எம்ஜிஆர் சிலைக்கு மாலை அணிவித்து மரியாதை செலுத்தினர். 
இதேபோல, ஜெயலலிதா பேரவைச் செயலாளர் ஓம்சக்தி சேகர் தலைமையில் முன்னாள் எம்.பி. ராமதாஸ் உள்ளிட்டோரும் மரியாதை செலுத்தினர்.
 அம்மா மக்கள் முன்னேற்றக் கழகம் சார்பில் அதன் மாநிலச் செயலாளர் வேல்முருகன் தலைமையில் அக்கட்சியினர் எம்ஜிஆர் சிலைக்கு மாலை அணிவித்து மரியாதை செலுத்தினர்.