நெட்டப்பாக்கம் போலீஸாருக்கு டிஜிபி பாராட்டு

நாட்டின் சிறந்த காவல் நிலையங்களில் 4-ஆவது  இடத்தைப் பிடித்த புதுவை நெட்டப்பாக்கம் காவல் நிலைய போலீஸாருக்கு காவல்துறை தலைமை இயக்குநர் (டிஜிபி) சுந்தரி நந்தா இனிப்பு வழங்கி பாராட்டினார்.
நாட்டின் சிறந்த 10 காவல் நிலையங்கள் பட்டியலில் புதுவை மாநிலத்தின் நெட்டப்பாக்கம் காவல்நிலையம் நான்காம் இடத்தை வகிக்கிறது.
 இந்த நிலையில், மாநில காவல்துறை தலைமை இயக்குநர் சுந்தரி நந்தா திங்கள்கிழமை நெட்டப்பாக்கம் காவல்நிலையம் சென்று பார்வையிட்டார். அப்போது, காவல் அதிகாரிகளையும், காவலர்களையும் பாராட்டிய அவர், அவர்களுக்கு இனிப்பு வழங்கினார்.
 தொடர்ந்து செய்தியாளர்களிடம் டிஜிபி சுந்தரி நந்தா கூறியதாவது: 
நாட்டின் சிறந்த காவல் நிலையங்களில் 4-ஆவதாக நெட்டப்பாக்கம் காவல் நிலையம் தேர்வு செய்யப்பட்டிருப்பது நமது மாநிலத்துக்கு கிடைத்த கெளரவம். 
மாநிலத்தில் உள்ள அனைத்து காவல் நிலையங்களின் தேவைகளை நிறைவு செய்ய அரசு கூடுதலாக நிதி ஒதுக்க வேண்டும். காலிப் பணியிடங்களை நிரப்பவேண்டும் என்றார்.