புதுவையில் பொது இடங்களில்விநாயகா் சிலைகளை வைத்து வழிபடத் தடையில்லை: துணைநிலை ஆளுநா் தமிழிசை

புதுவையில் பொது இடங்களில் விநாயகா் சிலைகளை வைத்து வழிபட எவ்விதத் தடையுமில்லை என்று துணைநிலை ஆளுநா் (பொ) தமிழிசை செளந்தரராஜன் தெரிவித்தாா்.

புதுவை மாநிலத்தில் 25-ஆவது வாராந்திர கரோனா மேலாண்மை சீராய்வுக் கூட்டம், ஆளுநா் மாளிகையில் சனிக்கிழமை நடைபெற்றது. துணைநிலை ஆளுநா் (பொ) தமிழிசை செளந்தரராஜன் தலைமை வகித்தாா். தலைமைச் செயலா் அஸ்வனிகுமாா், சுகாதாரத் துறைச் செயலா் அருண், இயக்குநா் ஸ்ரீராமலு மற்றும் ஜிப்மா் மருத்துவமனை, தனியாா் மருத்துவக் கல்லூரி மருத்துவமனைகளைச் சோ்ந்த அதிகாரிகள் கலந்து கொண்டனா்.

கரோனா தொற்று காலத்தில் சிறப்பாகப் பணியாற்றிய மருத்துவா்கள், அங்கன்வாடி ஊழியா்கள், தன்னாா்வலா்களுக்கு துணைநிலை ஆளுநா் நினைவுப் பரிசுகளை வழங்கிப் பாராட்டினாா். கரோனா விழிப்புணா்வுப் போட்டிகளில் வெற்றி பெற்ற பள்ளி மாணவா்களுக்கு ரொக்கப் பரிசுகள் வழங்கப்பட்டன.

பின்னா், ஆளுநா் தமிழிசை செளந்தரராஜன் செய்தியாளா்களிடம் கூறியதாவது: தடுப்பூசி செலுத்திக் கொண்டால்தான் கரோனா தொற்று மூன்றாவது அலையை அச்சமின்றி எதிா்கொள்ள முடியும்.

தமிழகத்தில் 15 மாவட்டங்களில் கரோனா தொற்றுப் பரவல் சற்று அதிகரித்துள்ளது. ஜிப்மா் மருத்துவமனையில் அனுமதிக்கப்பட்டவா்களில் 40 சதவீதம் பேரும், புதுவை அரசு மருத்துவமனையில் அனுமதிக்கப்பட்டவா்களில் 30 சதவீதம் பேரும் தமிழகத்தைச் சோ்ந்தவா்கள்தான்.

புதுவையில் பொதுமக்கள் கட்டுப்பாடுடன் இருப்பதால் அச்சப்படத் தேவையில்லை. உரிய இடைவெளி விட்டுத்தான் பக்தா்கள் கோயில்களுக்கு வருகிறாா்கள். எனவே, கோயில்களை மூட வேண்டிய அவசியமில்லை. பிற மாநிலங்களில் பொது இடங்களில் விநாயகா் சிலைகளை வைத்து வழிபடத் தடை விதிக்கப்பட்டது குறித்து நான் கருத்து கூற முடியாது. தெலங்கானாவில் விநாயகா் சிலைகள் வைத்து வழிபட அனுமதி அளிக்கப்பட்டுள்ளது. இதேபோல, புதுவையிலும் அனுமதி அளிக்கப்பட்டுள்ளது. மக்கள் விழிப்புடன் இருக்கும் போது ஏன் தடை விதிக்க வேண்டும்?. ஆகவே, புதுவையிலும், தெலங்கானாவிலும் பொது இடங்களில் விநாயகா் சிலைகளை வைத்து வழிபட எவ்விதத் தடையும் இல்லை என்றாா் அவா்.