உழவா்களுக்கு வங்கிக் கணக்கில் உற்பத்தி மானியம்

பயிறு வகைகள், பருத்தி சாகுபடி செய்த உழவா்களுக்கு உற்பத்தி மானியம் அவா்களது வங்கிக் கணக்கில் செலுத்தப்பட்டது.

இதுகுறித்து புதுச்சேரி வேளாண் அமைச்சகம் வெளியிட்ட செய்திக்குறிப்பு:

2020-21-ஆம் ஆண்டு மணிலா, எள், சிறு தானியம், பயிறு வகைகள், பருத்தி சாகுபடி செய்த உழவா்களுக்கு உற்பத்தி மானியம் அவா்களது வங்கிக் கணக்கில் செலுத்தப்பட்டது.

2020-21-ஆம் ஆண்டு மணிலா சாகுபடி செய்தவா்களுக்கு ஏக்கருக்கு ரூ.5,000 வீதம் 444 விவசாயிகளுக்கு 524.36 ஏக்கருக்கு ரூ. 26,21,800-ம், எள் சாகுபடி செய்தவா்களுக்கு ஏக்கருக்கு ரூ.3,000 வீதம் 217 விவசாயிகளுக்கு 273.30 ஏக்கருக்கு ரூ. 8,19,900-ம், சிறு தானியம் சாகுபடி செய்தவா்களுக்கு ஏக்கருக்கு ரூ.5,000 வீதம் 60 விவசாயிகளுக்கு 60.29 ஏக்கருக்கு ரூ.3,01,450-ம், பயிறு வகைகள் சாகுபடி செய்தவா்களுக்கு ஏக்கருக்கு ரூ. 2,000 வீதம் 878 விவசாயிகளுக்கு 1007.61 ஏக்கருக்கு ரூ. 20,15,220-ம், பருத்தி சாகுபடி செய்த விவசாயிகளுக்கு ஏக்கருக்கு ரூ.10,000 வீதம் 9 விவசாயிகளுக்கு 4.14 ஏக்கருக்கு ரூ.41,400-ம் வழங்கப்பட்டது.

மேலும், புதுச்சேரி பொதுப்பிரிவு உழவா்களுக்கு உற்பத்தி மானியம் அவா்களது வங்கி கணக்கில் செலுத்தப்பட்டது என செய்திக்குறிப்பில் கூறப்பட்டது.