புதுச்சேரி தியாகப் பெருஞ்சுவரில் தியாகிகளின் பெயா்களைப் பதிப்பதற்கு எதிராக வீண் அரசியல் செய்ய வேண்டாம் என்று துணைநிலை ஆளுநா் (பொ) தமிழிசை செளந்தரராஜன் அறிவுறுத்தினாா்.
புதுச்சேரி வில்லியனூா் ஆச்சாா்யா கலை, அறிவியல் கல்லூரியின் 12-ஆவது பட்டமளிப்பு விழா வியாழக்கிழமை நடைபெற்றது. மாநில வேளாண் துறை அமைச்சா் தேனீ சி.ஜெயக்குமாா் முன்னிலை வகித்தாா். இதில் சிறப்பு விருந்தினராக துணைநிலை ஆளுநா் தமிழிசை சௌந்தரராஜன் கலந்துகொண்டு, மாணவ, மாணவிகளுக்கு பட்டங்கள், பதக்கங்களை வழங்கி சிறப்புரையாற்றினாா்.
இதையடுத்து, அவா் செய்தியாளா்களிடம் கூறியதாவது: நாட்டின் 75-ஆவது சுதந்திர தின விழாவை சிறப்பாகக் கொண்டாடுவதற்காக, பிரதமா் மோடி தலைமையில் சனிக்கிழமை (ஆகஸ்ட் 6) குழு அமைத்து, அதற்கான ஆலோசனைக் கூட்டமும் நடைபெறவுள்ளது. இதில் நானும் பங்கேற்கவுள்ளேன்.
புதுவையிலும் சுந்திர தின விழா ஏற்பாடுகளை சிறப்பாக மேற்கொண்டு வருகிறோம். சுதந்திர தினத்தில் அனைத்து தியாகிகளுக்கும் மரியாதை கொடுத்து கொண்டாடுவோம்.
வீரசாவா்க்கா் அந்தமானில் 10 ஆண்டுகள் தனிமைச் சிறையிலிருந்து நாட்டுக்காகப் போராடியிருக்கிறாா். புதுச்சேரி தியாகப் பெருஞ்சுவரில் அவரது நினைவு பெயா்ப் பலகையைப் பதித்ததற்கு, சிலா் தேவையில்லாமல் பிரச்னை செய்து வருகின்றனா். இதை அரசியலாக்க வேண்டாம்.
எதிா்ப்புத் தெரிவிப்பவா்கள், அந்தமான் தனிமைச் சிறையில் ஒரு நாள் இருப்பாா்களா? வீரசாவா்க்கா் நாட்டுக்காக சிறையில் இருந்தது உண்மை. அவா் சுதந்திரப் போராட்ட வீரா்தான்.
அவரது பெயா்ப் பலகையைப் பதித்ததற்கு எதிா்ப்புத் தெரிவிப்பவா்கள், தேச வரலாறு தெரியாதவா்களாகவே இருப்பாா்கள். புதுவை ஆளுநா் மாளிகை நிா்வாகம் வெளிப்படையாகவே செயல்படுகிறது; எந்தக் குற்றச்சாட்டையும் எதிா்கொள்ளும் என்றாா் அவா்.