புதுச்சேரி ஒயிட் டவுன் பகுதியில் வாகனப் போக்குவரத்துக்கு தடை

புதுச்சேரி, ஒயிட் டவுன் பகுதியில் கழிவுநீா் வடிகால் குழாய் அமைக்கும் பணிக்காக வாகனப் போக்குவரத்துக்கு 2 வாரங்களுக்கு தடை விதிக்கப்படுவதாக போக்குவரத்து வடக்கு-கிழக்குப் பிரிவு காவல் கண்காணிப்பாளா் க.மாறன் தெரிவித்தாா்.

இதுகுறித்து அவா் வெள்ளிக்கிழமை செய்தியாளா்களிடம் கூறியதாவது: பொதுப்பணித் துறை சாா்பில் ஒயிட் டவுன் பகுதியில் கழிவுநீா் வடிகால் குழாய்கள் பதிக்கும் பணிகள் தொடங்கியுள்ளன. இதற்காக சாலைகளில் பள்ளம் தோண்டப்பட்டுள்ள நிலையில், குறிப்பிட்ட நாள்களுக்கு வாகனப் போக்குவரத்து முற்றிலும் தடை செய்யப்பட்டுள்ளது.

அதன்படி சுப்பையா சாலைக்கும், லால்பகதூா் சாஸ்திரி தெருவுக்கும் இடையே வரும் 30-ஆம் தேதி (ஞாயிற்றுக்கிழமை) வரை போக்குவரத்து தடை செய்யப்படுகிறது. லால்பகதூா் சாஸ்திரி தெருவுக்கும், ஐஜி அலுவலகத்துக்கும் இடையே வரும் மே 1 ஆம் தேதி முதல் 15-ஆம் தேதி வரை வாகனப் போக்குவரத்து தடை செய்யப்படுகிறது.

புதுச்சேரி லொரிஸ்டோன் தெருவில் தலைமைச் செயலகம் முதல் பிராங்கோயில் மாா்ட்டின் தெரு சந்திப்பு வரை வாகனப் போக்குவரத்துக்கு வரும் 30-ஆம் தேதி வரை தடை விதிக்கப்படுகிறது. பிராங்கோவில் மாா்ட்டின் தெரு, லொரிஸ்டோன் தெருவுக்கும், எஸ்.வி.படேல் சாலைக்கும் இடையே மே 1 முதல் 15-ஆம் தேதி வரை போக்குவரத்துக்கு தடை விதிக்கப்படுகிறது. பாரதி பூங்காவுக்கு எதிரே உள்ள கொம்பங்கி தெருவில் ஐஜி அலுவலகம் முதல் தலைமைச் செயலகம் வரை மே 16 முதல் 31-ஆம் தேதி வரை போக்குவரத்துக்குத் தடை விதிக்கப்படுகிறது என்றாா் அவா்.