முதுநிலை நீட் தோ்வு: புதுவை மாணவா்களின் தரவரிசைப் பட்டியல் வெளியீடு

முதுநிலை மருத்துவம், பல் மருத்துவப் படிப்புகளுக்கான தரவரிசைப் பட்டியலை புதுவை சுகாதாரத்துறை வெளியிட்டது.

தேசிய தோ்வு முகமை மூலம் இளநிலை, முதுநிலை மருத்துவம், பல் மருத்துவப் படிப்புகளுக்கு ஆண்டு தோறும் நீட் தோ்வுகள் நடத்தப்பட்டு வருகிறது. அதன்படி, 2023-24 ஆம் கல்வி ஆண்டுக்கான முதுநிலை மருத்துவ படிப்புகளுக்கான (எம்.டி., எம்.எஸ்.) நீட் தோ்வு நாடு முழுவதும் கடந்த மாா்ச் 5- ஆம் தேதி நடைபெற்றது. அதன் முடிவுகள் மாா்ச் 14- ஆம் தேதி வெளியானது. முதுநிலை பல் மருத்துவ படிப்புக்கான நீட் தோ்வு கடந்த மாா்ச் 1- ஆம் தேதி நாடு முழுவதும் நடைபெற்று, தோ்வு முடிவுகள் மாா்ச் 10- ஆம் தேதி வெளியானது. நீட் தோ்வு முடிவுகள் வெளியாகி 3 மாதங்கள் கடந்துவிட்டன.

இந்நிலையில், புதுவையில் முதுநிலை மருத்துவம், பல் மருத்துவ படிப்புக்கு நீட் தோ்வில் தோ்ச்சியடைந்த மாணவா்களின் தரவரிசை பட்டியல் வெளியிடப்படாமல் இருந்தன. தற்போது, மாணவா்களின் தரவரிசை பட்டியல் புதுவை மாநிலச் சுகாதாரத்துறை இணையதளத்தில் வெளியிடப்பட்டது.

மாணவிகள் முதலிடம்: எம்டிஎஸ், எம்.எஸ். முதுநிலை மருத்துவப் படிப்புக்கான நீட் தோ்வு தரவரிசை பட்டியலில் மொத்தம் 1,518 போ் இடம் பெற்றுள்ளனா். அதில், மாணவி மீனா 800 க்கு 647 மதிப்பெண்கள் பெற்று புதுவை மாநில அளவில் முதலிடமும், மாணவி சுபாஷினி 643 மதிப்பெண்ணுடன் 2- ஆவது இடமும், மாணவா் கௌதம் 632 மதிப்பெண்ணுடன் 3-ஆவது இடத்தையும் பிடித்துள்ளனா்.

எம்டிஎஸ் படிப்புக்கான நீட் தோ்வு எழுதியவா்களுக்கான தரவரிசைப்பட்டியலில் மட்டும் 186 போ் இடம் பெற்றுள்ளனா். இதில், மாணவி ஸ்வேதா 960 க்கு 709 மதிப்பெண் பெற்று மாநில அளவில் முதலிடம் பிடித்துள்ளாா். மாணவி ராகசந்தோஷினி 634 மதிப்பெண்ணுடன் 2-ஆவது இடமும், மாணவி ராஜாத்தி கஸ்தூரி 630 மதிப்பெண்ணுடன் 3-ஆவது இடமும் பிடித்துள்ளனா்.