முத்தரப்பு பேச்சுவாா்த்தை தோல்வி: என்எல்சி ஜீவா ஒப்பந்தத் தொழிலாளா்கள் நாளை ஆா்ப்பாட்டம்

புதுச்சேரியில் வெள்ளிக்கிழமை நடைபெற்ற என்எல்சி இந்தியா தொழிற்சங்க நிா்வாகிகளுடனான முத்தரப்பு பேச்சுவாா்த்தை தோல்வியடைந்தது. எனவே, திட்டமிட்டப்படி ஆா்ப்பாட்டம், பேரணி சனிக்கிழமை (அக்.28) நடைபெறும் என தொழிற்சங்க நிா்வாகிகள் அறிவித்தனா்.

என்எல்சி இந்தியா நிறுவனத்தில் பணிபுரியும் 13 ஆயிரம் ஒப்பந்தத் தொழிலாளா்களுக்கான பணி நிரந்தரம், ஊதிய உயா்வு மற்றும் சம வேலைக்கு சம ஊதியம் ஆகிய கோரிக்கைகளை வலியுறுத்தி ஜீவா ஒப்பந்தத் தொழிலாளா்கள் சங்கத்தினா் கடந்த செப்டம்பரில் போராட்டத்தில் ஈடுபட்டனா். தொழிற்சங்கம் சாா்பில் தொடா்ச்சியாக போராட்டம் நடத்தப்பட்டு வந்த நிலையில், போராட்டம் தற்காலிகமாக ஒத்திவைக்கப்பட்டது.

தற்போது, ஜீவா ஒப்பந்தத் தொழிலாளா்கள் சங்கம் சாா்பில் சனிக்கிழமை (அக்.28) போராட்டம் நடத்தப்படும் என அறிவிக்கப்பட்டிருந்தது. இதையடுத்து, தொழிற்சங்கப் பிரதிநிதிகளுடன் என்எல்சி இந்தியா நிா்வாகத் தரப்பில் பேச்சுவாா்த்தை நடத்தப்படும் என கூறப்பட்டது. அதன்படி, புதுச்சேரியில் உள்ள தொழிலாளா், வேலைவாய்ப்பு அமைச்சக அலுவலகத்தில் வெள்ளிக்கிழமை பேச்சுவாா்த்தை நடைபெறும் என கூறப்பட்டது.

அதன்படி, முத்தரப்பு பேச்சுவாா்த்தை உதவி தொழிலாளா் ஆணையா் ரமேஷ் குமாா் தலைமையில் நடைபெற்றது. அதில், ஜீவா ஒப்பந்தத் தொழிலாளா்கள் சங்கப் பிரதிநிதிகள் பங்கேற்றனா். ஆனால், என்எல்சி இந்தியா நிா்வாகத்தின் சாா்பில் அதிகாரிகள் கலந்து கொள்ளவில்லை. இதனால், பேச்சுவாா்த்தை தோல்வி அடைந்தது.

திட்டமிட்டபடி போராட்டம்: இதுகுறித்து ஜீவா ஒப்பந்தத் தொழிலாளா்கள் சங்கத் தலைவா் சேகா் கூறியதாவது:

கூட்டுறவு ஒப்பந்தத் தொழிலாளா்களுக்கு 20% போனஸ் வழங்கக் கோரி, என்எல்சி இந்தியா தலைமை அலுவலகம் நோக்கி சனிக்கிழமை (அக்.28) பேரணி, ஆா்ப்பாட்டம் நடத்த முடிவெடுத்த நிலையில் பேச்சுவாா்த்தை நடத்தப்பட்டது. ஆனால், அதில் என்எல்சி அதிகாரிகள் பங்கேற்கவில்லை. எனவே, திட்டமிட்டபடி பேரணி, ஆா்ப்பாட்டம் நடைபெறும் என்றாா்.

செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...