ஏனாமில் புயல், மழை: பாதிக்கப்பட்டோருக்கு தலா ரூ.5,000 வழங்க துணைநிலை ஆளுநரிடம் காங்கிரஸ் மனு

ஏனாமில் புயல், தொடா் மழையால் பாதிக்கப்பட்ட அனைத்துக் குடும்ப அட்டைதாரா்களுக்கும் தலா ரூ.5 ஆயிரம் நிவாரண உதவி வழங்கக்கோரி துணைநிலை ஆளுநா் கே.கைலாஷ்நாதனிடம் ஏனாம் காங்கிரஸ் தலைவா் அா்த்தானி தினேஷ் செவ்வாய்க்கிழமை மனு அளித்தாா்.

அந்த மனுவில் கூறியிருப்பதாவது:

அண்மையில் பெய்த ‘மோந்தா’ புயல் மழையால் ஏனாம் பிராந்திய மக்கள் கடுமையாகப் பாதிக்கப்பட்டுள்ளனா். ஏனாமின் பல பகுதிகளில் சாலைகள் இல்லாததால், அத்தியாவசியப் பொருள்களை வாங்க வெளியே செல்வதில் மக்கள் சிரமங்களை எதிா்கொண்டனா்.

இந்த நிலை தொடா்ந்தால், வரும் நாள்களில், ஏனாம் மக்கள் தங்கள் வீட்டு வரி, தண்ணீா் வரி மற்றும் மின்சாரக் கட்டணங்களைச் செலுத்த முடியாமல் போகும்.

இதைக் கருத்தில் கொண்டு, ஏனாமில் சாலைகள் இல்லாத பகுதிகளைக் கண்டறிந்து, சீரான சாலைகள் அமைக்க வேண்டும்.

புயல் சேதத்தை மதிப்பிட்டு, ஏனாம் பகுதி குடும்ப அட்டைதாரா்களுக்கு தலா ரூ. 5000 வீதம் நிதியுதவி வழங்க வேண்டும். பாதிக்கப்பட்ட விவசாயிகள் மற்றும் மீனவா்களுக்கு அரசு உரிய இழப்பீடு வழங்க வேண்டும் என குறிப்பிட்டுள்ளாா்.