அமெரிக்காவுடனான ஒப்பந்தம் குறித்து நாடாளுமன்றத்தில் விவாதிக்க வேண்டும்: பி.ஆா். பாண்டியன்

புதுச்சேரி: அமெரிக்காவுடனான இந்தியா வேளாண் ஒப்பந்தம் குறித்து நாடாளுமன்றத்தில் விவாதிக்கப்பட வேண்டும் என்று தமிழ்நாடு அனைத்து விவசாய சங்கங்களின் ஒருங்கிணைப்புக் குழு தலைவா் பி.ஆா்.பாண்டியன் கூறினாா்.

அரசியல் சாா்பற்ற ஐக்கிய விவசாயிகள் சங்கம் சாா்பில், எம்.எஸ். சுவாமிநாதன் குழுவின் பரிந்துரைகளை நிறைவேற்ற வேண்டும். விவசாயிகளின் வங்கிக் கடன்களைத் தள்ளுபடி செய்ய வேண்டும் என்பன உள்ளிட்ட பல்வேறு கோரிக்கைகளை நிறைவேற்ற வலியுறுத்தி கன்னியாகுமரி முதல் காஷ்மீா் வரையிலான விவசாயிகள் யாத்திரை பிப். 7-இல் கன்னியாகுமரியில் தொடங்கியது.

இந்த யாத்திரைக் குழுவினா் புதுச்சேரி வந்து முதல்வா் ரங்கசாமியை திங்கள்கிழமை சந்தித்தனா். தேசிய ஒருங்கிணைப்பாளா் ஜக்ஜித் சிங் தல்லேவால் தலைமையில் தமிழ்நாடு அனைத்து விவசாய சங்கங்களின் ஒருங்கிணைப்புக் குழு தலைவா் பி.ஆா்.பாண்டியன், ஐக்கிய விவசாயிகள் சங்கத்தின் தமிழகத் தலைவா் அய்யாக்கண்ணு, பொன்.ராஜேந்திரன் உள்ளிட்டோா் முதல்வா் ரங்கசாமியிடம் தங்கள் பயணத்தின் நோக்கம் குறித்து விளக்கினா்.

இந்த பயணம் குறித்து பி.ஆா்.பாண்டியன் செய்தியாளா்களிடம் கூறியதாவது:

மறைந்த வேளாண் விஞ்ஞானி எம்.எஸ். சுவாமிநாதன் குழு அளித்த பரிந்துரையை மத்திய அரசு நிறைவேற்ற வேண்டும். அனைத்து வேளாண் விளைபொருள்களுக்கும் குறைந்தபட்ச ஆதரவு விலை நிா்ணய சட்டத்தைக் கொண்டுவர வேண்டும். தேசிய மயமாக்கப்பட்ட வங்கிகளில் விவசாயிகள் வாங்கியுள்ள வேளாண் கடன்களைத் தள்ளுபடி செய்ய வேண்டும். விவசாயத்துக்கான இலவச மின்சாரத்தை ரத்து செய்யும் அடிப்படை நோக்கம் கொண்ட மத்திய அரசின் மின்சார ஒழுங்குமுறை ஆணையச் சட்டத்தைத் திரும்ப பெற வலியுறுத்தி இந்த யாத்திரையை தொடங்கியுள்ளோம். தில்லியில் வரும் மாா்ச் 19-ஆம் தேதி பேரணி நடத்தி அடுத்தக் கட்ட முடிவை எடுப்போம்.

அமெரிக்காவுடன் தடையற்ற ஒப்பந்தம் குறித்து எவ்வித விவாதமும் நாடாளுமன்றத்தில் நடத்தாமல் திடீரென்று ஏற்றுள்ளதாக பிரதமா் மோடி அறிவித்துள்ளாா். வெளிநாட்டு வேளாண்மை பொருள்கள் இறக்குமதியால் இந்திய விவசாயிகள் பாதிக்கப்படுவாா்கள். முதலில் விவசாயிகளிடம் கருத்துக் கேட்பதுடன் நாடாளுமன்றத்தில் விவாதிப்பது அவசியம்.

முதல்வா் ரங்கசாமியிடம் கோரிக்கைகளை தெரிவித்தோம். இதுகுறித்து பிரதமருக்கு கடிதம் எழுதுவதாக உறுதியளித்துள்ளாா். மேலும், புதுச்சேரி வரும் பிரதமரிடம் இதுபற்றி நேரில் விளக்குவதாகவும் உறுதியளித்தாா். இதேபோல அனைத்து மாநில முதல்வா்களையும் சந்திப்போம்.

அமெரிக்க ஒப்பந்தம் தொடா்பாக வா்த்தக அமைச்சா் பியூஸ் கோயல், நாடாளுமன்றம் நடக்கும்போது மரபுப்படி அறிக்கை தாக்கல் செய்து பேசியிருக்கவேண்டும். இது நாட்டின் 80 சதவீத விவசாயிகளின் பிரச்னை. நாடாளுமன்றத்தில் விவாதிக்க அச்சப்படுவது ஏன்?

ஒப்பந்தத்தை இறுதி செய்யும் முன், நாடாளுமன்றம் நடக்கும்போது அவைக்கு வெளியில் அறிவித்தது தவறு. அது சந்தேகத்தை ஏற்படுத்துகிறது. மத்திய அமைச்சா் பியூஸ் கோயல் கருத்து காா்ப்பரேட் நிறுவனங்களுக்கு ஆதரவானது. இதில் பிரதமா், வேளாண் அமைச்சா் எச்சரிக்கையுடன் செயல்பட வேண்டும் என்றாா்.