அரசு தொழிற்பயிற்சி கல்லூரிக்கு இடம் தேர்வு

திண்டிவனத்தில் புதிதாக அரசு  தொழிற்பயிற்சி கல்லூரி அமைப்பதற்கான இடம் தேர்வு செய்யும் பணி வெள்ளிக்கிழமை நடைபெற்றது.

 தமிழக முதல்வர் ஜெயலலிதா திண்டிவனத்தில் புதிதாக தொழிற்பயிற்சிக் கல்லூரி இந்த கல்வி ஆண்டிலேயே தொடங்கப்படும் என அறிவித்துள்ளார். இக்கல்லூரி தாற்காலிகமாக திண்டிவனம் நகர எல்லைக்குள் அடுத்த 10 நாள்களில் செயல்பட உள்ளது. இதற்காக சந்தைமேடு பகுதியில் தனியாருக்குச் சொந்தான இடம் வெள்ளிக்கிழமை தேர்வு செய்யப்பட்டது.

 மேலும், நிரந்தரமாக கல்லூரிக் கட்டடம் அமைக்க சந்தைமேடு பகுதியில் புறவழிச்சாலை அருகே அரசுக்கு சொந்தமான இடம் தேர்வு செய்யப்பட்டது. இந்த இடத்தை நகர்மன்றத் தலைவர் கே.வி.என்.வெங்கடேசன் தலைமையில், தொழிற்பயிற்சி கல்லூரிகளின் திருச்சி மண்டல இணை இயக்குநர் டான்பாஸ்கோ, திண்டிவனம் தொழிற்பயிற்சி கல்லூரி முதல்வர் (பொறுப்பு) சிவகாமி ஆகியோர் பார்வையிட்டனர்.

 நகர்மன்ற உறுப்பினர்கள் பாலச்சந்திரன், சாரதாம்பாள் ஐயப்பன், தொழிற்பயிற்சி அலுவலர் நாகரத்தினம் மற்றும் வருவாய்த்துறை அதிகாரிகள் உடனிருந்தனர்.