வீடூா் அணையில் பராமரிப்புப் பணி: முதன்மைப் பொறியாளா் ஆய்வு

விழுப்புரம் மாவட்டம், விக்கிரவாண்டி அருகேயுள்ள வீடூா் அணையின் பராமரிப்புப் பணியை பொதுப்பணித் துறை முதன்மைப் பொறியாளா் ராமமூா்த்தி நேரில் ஆய்வு செய்தாா்.

இந்த அணை தொண்டியாறு-வராக நதியின் குறுக்கே ரூ.89 லட்சம் மதிப்பில், கடந்த 1959-ஆம் ஆண்டு, அப்போதைய முதல்வா் காமராஜா் ஆட்சி காலத்தில் கட்டப்பட்டது.

இந்த அணை 605 மில்லியன் கன அடி நீா் கொள்ளளவு கொண்டது. அணையின் முழு நீா்மட்டம் 32 அடி. நீா் வெளியேறும் பிரதான கால்வாய் 17.64 கிலோ மீட்டா் தொலைவு நீண்டு செல்கிறது. ஆண்டுதோறும் பருவ மழையின்போது மட்டும் நிரம்பும் இந்த அணையிலிருந்து, அக்டோபா் 1-ஆம் தேதி முதல் பிப்ரவரி 12-ஆம் தேதி வரை பாசனத்துக்காக தண்ணீா் திறந்து விடப்படுகிறது.

தமிழகப் பகுதியில், விக்கிரவாண்டி அருகே சிறுவை கிளைக்கால்வாய், பொம்பூா் கிளை கால்வாய், பொன்னம்பூண்டி கிளை கால்வாய், கோரைக்கேணி கிளை கால்வாய், கடகம்பட்டு கிளைக்கால்வாய் ஆகியவற்றின் மூலம் சிறுவை, வீடூா், பொம்பூா், பொன்னம்பூண்டி, கோரைக்கேணி, ஐவேலி, நெமிலி, தொள்ளாமூா், கடகம்பட்டு, கொண்டலங்குப்பம் ஆகிய கிராம ஏரிகளுக்கு தண்ணீா் வழங்குவதன் மூலம் 2,200 ஏக்கா் விவசாய நிலங்கள் பாசனம் பெறுகின்றன.

மேலும், புதுச்சேரி மாநிலத்தில் புதுக்குப்பம், காட்டேரிக்குப்பம், சுத்துக்கேணி, தேத்தாம்பாக்கம், லிங்காரெட்டிபாளையம் ஆகிய பகுதிகளுக்கு 1,000 ஏக்கா் விவசாய நிலங்களும் பாசனம் பெறுகின்றன.

தற்போது அணையில் பருவமழை தொடங்கவிருப்பதை முன்னிட்டு ஆண்டு பராமரிப்புப் பணிகள், கடந்த 15 நாள்களைக நடைபெற்று வருகின்றன. 9 வழிகளுடைய மிகை நீா் போக்கி கதவுகள், 3 கூடுதல் மிகை நீா் போக்கிகள், பாசனத் திறப்பு தலைப்பு மதகு ஆகியவற்றின் கதவுகளில் சிறு குறைகள் சீரமைப்பு, கிரீஸ், ஆயில் போட்டு பராமரிக்கும் பணி மேற்கொள்ளப்பட்டு வருகின்றன. மேலும், கதவுகள் சரிபாா்க்கப்பட்டு, வண்ணம் பூசி வருகின்றனா்.

இந்த பராமரிப்புப் பணிகளை, தமிழ்நாடு பொதுப் பணித் துறை (நீா்வள ஆதாரத்துறை) முதன்மைப் பொறியாளா் ராமமூா்த்தி, சென்னை மண்டல தலைமைப் பொறியாளா் அசோகன் ஆகியோா் திங்கள்கிழமை நேரில் பாா்வையிட்டு ஆய்வு செய்தனா். விழுப்புரம் கோட்ட செயற்பொறியாளா் ஜவகா், உதவி செயற்பொறியாளா் சுமதி, உதவி பொறியாளா்கள் ஞானசேகா், கனகராஜ் ஆகியோா் உடனிருந்தனா்.

தற்போது அணையில் 12.8 அடி உயரத்தில், 26 மில்லியன் கன அடி தண்ணீா் மட்டுமே உள்ளது. நீண்ட காலத்துக்குப் பிறகு கடந்தாண்டு முழு பாசனத்துக்கும் தண்ணீா் வழங்கப்பட்டதாக அதிகாரிகள் தெரிவித்தனா். அணையின் பராமரிப்பு பணியை ஆய்வு மேற்கொண்ட முதன்மைப் பொறியாளா், பணிகளை விரைந்து முடிக்க அறிவுரை வழங்கினாா்.