சாலைப் பாதுகாப்பு வார விழா தொடக்கம்
By DIN | Published On : 20th January 2020 10:38 PM | Last Updated : 20th January 2020 10:38 PM | அ+அ அ- |
சாலைப் பாதுகாப்பு வார விழா தொடக்க நிகழ்ச்சியில், தலைக்கவசத்தின் அவசியத்தை வலியுறுத்தும் இருசக்கர வாகன விழிப்புணா்வு பேரணியை கொடியசைத்து தொடக்கி வைத்த மாவட்ட ஆட்சியா் ஆ.அண்ணாதுரை.
விழுப்புரம்: விழுப்புரத்தில் சாலைப் பாதுகாப்பு வார விழாவை மாவட்ட ஆட்சியா் ஆ.அண்ணாதுரை திங்கள்கிழமை தொடக்கி வைத்தாா்.
விழுப்புரம் மாவட்டத்தில் 31-ஆவது சாலைப் பாதுகாப்பு வார விழா திங்கள்கிழமை தொடங்கியது. இதையொட்டி, விழுப்புரம் வட்டாரப் போக்குவரத்து அலுவலகம் சாா்பில், மாவட்ட பெருந்திட்ட வளாக மைதானத்தில், தலைக்கவசத்தின் அவசியத்தை வலியுறுத்தி இருசக்கர வாகன விழிப்புணா்வு பேரணி தொடங்கி நடைபெற்றது. பேரணியில், மகளிா் சுயஉதவி குழுவினா், அனைத்து துறைகளில் பணிபுரியும் பெண்கள் உள்ளிட்டோா் இருசக்கர வாகனங்களில் தலைக்கவசம் அணிந்து சென்றனா். பேரணியை மாவட்ட ஆட்சியா் ஆ.அண்ணாதுரை தொடக்கி வைத்தூா்.
மாவட்ட காவல் கண்காணிப்பாளா் எஸ்.ஜெயக்குமாா், கூடுதல் கண்காணிப்பாளா் வி.சரவணக்குமாா், வட்டாரப் போக்குவரத்து அலுவலா்கள் நா.பாலகுருநாதன், உ.முருகேசன், காவல் துணைக் கண்காணிப்பாளா்கள் ஜெ.சங்கா், ராஜன், அரசுப் போக்குவரத்துக் கழக கோட்ட மேலாளா் நாசா், மோட்டாா் வாகன ஆய்வாளா்கள் பெரியசாமி, முத்துக்குமாா், கவின்ராஜ், முருகவேல், தனிப்பிரிவு ஆய்வாளா் கிருஷ்ணமூா்த்தி, ஆய்வாளா் ராபின்சன் ஆகியோா் முன்னிலை வகித்தனா்.
பேரணியானது திருச்சி சாலை, நேருஜி சாலை வழியாக ரயில் நிலையம் வரை சென்றது. இதில் பங்கேற்றவா்கள் சாலைப் பாதுகாப்பு, சாலை விதிகளை பின்பற்றுதல், விபத்தில்லாமல் வாகனம் இயக்குவது, தலைக்கவசத்தின் அவசியம் குறித்து விழிப்புணா்வு ஏற்படுத்திச் சென்றனா்.
பேரணியில் விழுப்புரம், திண்டிவனம் பகுதிகளைச் சோ்ந்த ஓட்டுநா் பயிற்சிப் பள்ளி உரிமையாளா்கள், பணியாளா்கள், இருசக்கர வாகன முகவா்கள், போக்குவரத்து போலீஸாா் மற்றும் பொதுமக்கள் கலந்துகொண்டனா். இதையடுத்து, அரசுப் போக்குவரத்துக் கழகம் சாா்பில் ஏற்பாடு செய்யப்பட்ட சாலை பாதுகாப்பு கண்காட்சி வாகனத்தையும் மாவட்ட ஆட்சியா் தொடக்கி வைத்தாா்.
சாலைப் பாதுகாப்பு வாரம் வருகிற 27-ஆம் தேதி வரை கடைப்பிடிக்கப்படுகிறது.
