விழுப்புரத்தில் போலீஸாா் நூதன முறையில் விழிப்புணா்வு

கரோனா பரவலைத் தடுக்க பொதுமக்கள் தேவையில்லாமல் வெளியே சுற்றித்திரிவதை கட்டுப்படுத்த நூதன முறையில் போலீஸாா் செவ்வாய்க்கிழமை விழிப்புணா்வு ஏற்படுத்தினா்.

விழுப்புரத்தில் செவ்வாய்க்கிழமை ஒரே நாளில் மூவருக்கு கரோனா வைரஸ் தொற்று உறுதி செய்யப்பட்டது. இவா்கள் மூலமாக யாா் யாருக்கெல்லாம் தொற்று பரவியுள்ளது என்பதைக் கண்டறிய சுகாதாரத் துறை தீவிர நடவடிக்கைகளை மேற்கொண்டுள்ளது.

இத்தகைய சூழலிலும் விழுப்புரம் நகரச் சாலைகளில் பொதுமக்கள் இரு சக்கர வாகனங்களில் தேவையில்லாமல் திரிந்தனா். அதேபோல, சிக்னல் பகுதியில் சுற்றித் திரிந்தவா்களை பிடித்த போலீஸாா், கரோனா பரவலால் ஏற்படப்போகும் பாதிப்பை விளக்கும் வகையில் நூதன முறையில் விழிப்புணா்வு ஏற்படுத்தினா். விழுப்புரம் டி.எஸ்.பி. சங்கா் தலைமையிலான போலீஸாா், துக்க நிகழ்வுகளில் பயன்படுத்தப்படும் தாரை தப்பட்டை, சங்கு ஆகியவற்றை இசைத்து, கரோனா பாதித்தால் இறப்பு ஏற்படவும் வாய்ப்புள்ளது. ஆகவே, சமூக இடைவெளியை பொதுமக்கள் கடைப்பிடிக்க வேண்டும். தேவையில்லாமல் வீடுகளை விட்டு வெளியே வர வேண்டாம். அத்தியாவசியப் பொருள்கள் வாங்க வெளியே வந்தாலும், முகக் கவசம் அணிந்து வெளியே வாருங்கள் என்று அறிவுறுத்தினா்.

விழுப்புரம் போக்குவரத்து காவல் ஆய்வாளா் முத்துக்குமரன் உள்ளிட்ட போலீஸாா் உடனிருந்தனா்.