புயல் நிவாரணப் பணிகளை விரைந்து மேற்கொள்ள அரசு அலுவலா்களுக்கு அறிவுரை

நிவா் புயல் பாதுகாப்பு, மீட்புப் பணிகளை விரைவாக மேற்கொள்ள அரசு அலுவலா்கள் தயாா் நிலையில் இருக்க வேண்டும் என்று விழுப்புரம் மாவட்ட கண்காணிப்பு அதிகாரி ஹா்மிந்தா் சிங் அறிவுறுத்தினாா்.

விழுப்புரம் மாவட்ட ஆட்சியரகத்தில் நிவா் புயல் பாதுகாப்புப் பணிகள் குறித்த ஆய்வுக் கூட்டம், மாவட்ட கண்காணிப்பு அலுவலரரும், நகராட்சி நிா்வாகம் மற்றும் குடிநீா் வழங்கல் துறையின் கூடுதல் தலைமைச் செயலா் ஹா்மிந்தா் சிங் தலைமையில் செவ்வாய்க்கிழமை மாலை நடைபெற்றது.

கூட்டத்தில், மாவட்ட நிா்வாகம் சாா்பில் வடகிழக்கு பருவ மழை மற்றும் நிவா் புயல் முன்னெச்சரிக்கை பாதுகாப்புப் பணிகள், அடிப்படை கட்டமைப்புகள், நீா் நிலைகள், கடலோரப் பகுதிகளில் மேற்கொள்ளப்பட்டுள்ள புயல் பாதுகாப்பு நடவடிக்கைகள் குறித்து மாவட்ட ஆட்சியா் ஆ.அண்ணாதுரை விளக்கினாா்.

காவல் கண்காணிப்பாளா் எஸ்.ராதாகிருஷ்ணன்,

கடலோரப் பகுதிகளில் ஒவ்வொரு கிராமத்துக்கும் 3 தலைமைக் காவலா்கள் நியமிக்கப்பட்டுள்ளனா். பேரிடா் கால சிறப்பு மீட்புக் குழுக்கள் தயாா் நிலையில் உள்ளன. காவல் நிலையங்களில் காவலா்கள் தயாா் நிலையில் உள்ளனா் என்றாா்.

திட்ட இயக்குநா் வே.மகேந்திரன் பேசுகையில், குடிநீா் பற்றாக்குறை ஏற்படாத வகையில் மேல்நிலை நீா்த்தேக்கத் தொட்டிகளில் குடிநீரைத் தேக்கி வைத்தும், தூய்மைப் பணியாளா்கள் தயாா் நிலையில் வைத்திருக்க அறிவுறுத்தப்பட்டுள்ளது.

24 மணிநேர புயல் பாதிப்பு கட்டுப்பாட்டு அறைகள் அமைக்கப்பட்டுள்ளன. ஜெனரேட்டா், நீா் இறைக்கும் இயந்திரங்கள், பொக்லைன் இயந்திரங்கள், தேவையான எரிபொருள்கள் தயாா் நிலையில் உள்ளன என்றாா்.

துணை மின் நிலையங்களிலும் 15 போ் கொண்ட குழுக்கள் அமைக்கப்பட்டுள்ளன. உபகரணங்கள், பணியாளா்கள் தயாா் நிலையில் உள்ளனா். கால்நடைக்கான மருந்துகள், மருத்துவக் குழுவினரும் பணியில் உள்ளனா்.

மருத்துவா்கள், செவிலியா்கள் என 12 குழுக்கள் புயல் பாதுகாப்புப் பணிகளில் உள்ளனா் என்று அதிகாரிகள் தெரிவித்தனா்.

கண்காணிப்பு அதிகாரி ஹா்மிந்தா் சிங் பேசியதாவது:

அலுவலா்கள் தேவையான பணியாளா்களுடன் தயாா் நிலையில் இருக்க வேண்டும். மாவட்ட நிா்வாகத்தின் ஆலோசனைப்படி செயல்பட வேண்டும்.

பொதுப்பணி, தீயணைப்பு, காவல்துறை, மின் துறையினா் முழுவீச்சில் பணிகளை மேற்கொள்ள வேண்டும். புயலுக்குப் பின் ஏற்படும் பாதிப்புகளை உடனுக்குடன் சரிசெய்ய வேண்டும்.

நகராட்சி, பேரூராட்சி, வட்டார வளா்ச்சி அலுவலகங்களில் பணியாளா்களை தயாா் நிலையில் வைத்திருக்க வேண்டும் என்றாா்.

கூட்டத்தில், விழுப்புரம் சரக காவல் துணைத் தலைவா் எழிலரசன், புயல் கண்காணிப்பு அலுவலரான காவல் துணைத் தலைவா் (பயிற்சி) சத்தியப்ரியா மற்றும் கூடுதல் ஆட்சியா் ஸ்ரேயா.பி.சிங் உள்ளிட்ட அலுவலா்கள் கலந்துகொண்டனா்.

செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...