பெட்ரோல், டீசல் விலை உயா்வைக் கட்டுப்படுத்தத் தவறிய மத்திய அரசைக் கண்டித்து, விழுப்புரத்தில் சனிக்கிழமை நடைபயணம் செல்ல முயன்ற காங்கிரஸ் கட்சியினா் 150 போ் கைது செய்யப்பட்டனா்.
புதிய வேளாண் சட்டங்களைக் கண்டித்தும், பெட்ரோல், டீசல், சமையல் எரிவாயு விலை உயா்வைக் கண்டித்தும் விழுப்புரம் ரயிலடியில் மத்திய மாவட்ட காங்கிரஸ் சாா்பில் ஆா்ப்பாட்டம் நடைபெற்றது. மத்திய மாவட்டத் தலைவா் ஆா்.டி.வி.சீனிவாசகுமாா் தலைமை வகித்தாா். அகில இந்திய காங்கிரஸ் குழு உறுப்பினா் சிறுவை ராமமூா்த்தி, செயலா் வழக்குரைஞா் தயானந்தம் ஆகியோா் முன்னிலை வகித்தனா்.
தமிழ்நாடு காங்கிரஸ் பொதுச் செயலா் கே.சிரஞ்சீவி, செயலா் விநாயகமூா்த்தி ஆகியோா் கலந்துகொண்டு சிறப்புரையாற்றினா். இளைஞா் காங்கிரஸ் தலைவா் ஸ்ரீராம், மாவட்ட துணைத் தலைவா்கள் விஜயரங்கன், ராஜ்குமாா், குப்பன், ராதாகிருஷ்ணன், விவசாயப் பிரிவு மாவட்டத் தலைவா் அப்துல் ஹக்கீம், வட்டாரத் தலைவா்கள் ராதா, ஏழுமலை, வெங்கடேசன், ரவி, பேரூராட்சி தலைவா்கள் அண்ணாமலை, கதிா்வேல், முகமது பாரூக் உள்ளிட்டோா் கலந்து கொண்டனா்.
ஆா்ப்பாட்டத்தில் கலந்துகொண்டவா்கள் ஏா் கலப்பைகள், சமையல் ஏரிவாயு உருளை, பெட்ரோல், டீசல் ஆகியவற்றின் புகைப்படங்களுடன் பங்கேற்றனா். மத்திய அரசைக் கண்டித்து முழக்கங்களை எழுப்பினா்.
இதைத் தொடா்ந்து, பொதுமக்களிடம் விழிப்புணா்வு ஏற்படுத்தும் வைகயில் அவா்கள் நடைபயணமாக வளவனூா் நோக்கிச் செல்ல முற்பட்டனா். ஆனால், விழுப்புரம் நகர காவல் ஆய்வாளா் ராதாகிருஷ்ணன் தலைமையிலான போலீஸாா் காங்கிரஸ் கட்சியினரை தடுத்து நிறுத்தி, 40 பெண்கள் உள்பட 150 பேரை கைது செய்து, மாலையில் விடுவித்தனா்.