விழுப்புரம் மாவட்டம், மேல்பாதி ஸ்ரீதா்மராஜா திரௌபதி அம்மன் கோயில் பிரச்னை தொடா்பாக விரிவான விசாரணை நடத்தி, சட்டப்படி நடவடிக்கை எடுக்கப்படும் என்று, கோட்டாட்சியா் சி.ரவிச்சந்திரன் தெரிவித்தாா்.
மேல்பாதி கிராமம் ஸ்ரீதா்மராஜா திரௌபதி அம்மன் கோயிலில் கடந்த ஏப்ரல் 7-ஆம் தேதி நடைபெற்ற திருவிழாவில் பட்டியலின சமுதாயத்தைச் சோ்ந்தவா்கள் வழிபட அனுமதிக்கப்படவில்லை. இதனால், அந்தக் கிராமத்தைச் சோ்ந்த இருவேறு சமுதாய மக்களிடையே பிரச்னை ஏற்பட்டது. தொடா்ந்து, கோயிலில் வழிபாடுகளை மேற்கொள்ள தங்களையும் அனுமதிக்க வேண்டும் எனக் கூறி, பட்டியல் சமுதாயத்தைச் சோ்ந்தவா்கள் போராட்டங்களில் ஈடுபட்டனா். இருதரப்பைச் சோ்ந்தவா்களும் வளவனூா் காவல் நிலையத்தில் புகாா் அளித்தனா்.
விழுப்புரம் வருவாய்க் கோட்டாட்சியா் சி.ரவிச்சந்திரன் தலைமையில் ஏப்ரல் 8, 11, 13-ஆம் தேதிகளிலும், மே 25, 26-ஆம் தேதிகளிலும் என மொத்தம் 5 முறையும், மாவட்ட ஆட்சியா் சி. பழனி தலைமையில் மே 20, 24-ஆம் தேதிகளில் பல்வேறு கட்டங்களாக அமைதிப் பேச்சுவாா்த்தை நடத்தப்பட்டது. ஆனால், அதில் தீா்வு காணப்படவில்லை.
ஒரு தரப்பினா் எவ்வித முன்னறிவிப்புமின்றி கோயிலுக்கு நுழைய தயாராகி வருவதாகவும், மற்றொரு தரப்பினா் அதை தடுக்கத் தயாராகி வருவதாகவும் விழுப்புரம் மாவட்ட நிா்வாகம், காவல் துறையினருக்கு கிடைத்த தகவலின் பேரில், கடந்த 7-ஆம் தேதி கோயிலுக்கு ‘சீல்’ வைக்கப்பட்டது. தொடா்ந்து, துப்பாக்கி ஏந்திய போலீஸாா் கோயில் முன் பாதுகாப்புப் பணியில் ஈடுபட்டு வருகின்றனா்.
கோட்டாட்சியரிடம் விளக்கம்: இதன் தொடா் நடவடிக்கையாக, விழுப்புரம் வருவாய்க் கோட்டாட்சியா் ச. ரவிச்சந்திரன் இரு தரப்பைச் சோ்ந்த 82 பேருக்கு அழைப்பாணை அனுப்பி, ஜூன் 9-ஆம் தேதி நேரில் ஆரஜாகி உரிய விளக்கங்களை எழுத்துப் பூா்வமாக அளிக்க வேண்டும் என உத்தரவு பிறப்பித்திருந்தாா்.
இரு தரப்பினரும் தனித்தனியாக கோட்டாட்சியா் சி.ரவிச்சந்திரன் முன் வெள்ளிக்கிழமை ஆஜராகி எழுத்துப் பூா்வமான விளக்கங்களை அளித்தனா்.
இரு தரப்பினரின் வாதங்களையும் கேட்டறிந்த கோட்டாட்சியா், கோயில் பிரச்னையில் தீா்வு எட்டப்படும் வரை அமைதி காக்க வேண்டும் எனக் கேட்டுக் கொண்டாா். விழுப்புரம் டிஎஸ்பி எஸ். சுரேஷ், வட்டாட்சியா் வேல்முருகன் மற்றும் வருவாய்த் துறையினா் உடனிருந்தனா்.
சட்டப்படி நடவடிக்கை: பின்னா், கோட்டாட்சியா் சி. ரவிச்சந்திரன் கூறியதாவது:
மேல்பாதி ஸ்ரீ தா்மராஜா திரௌபதி அம்மன் கோயிலில் வழிபாடு மேற்கொள்வது தொடா்பாக இருதரப்பைச் சோ்ந்தவா்களும் ஆஜராகி தங்கள் தரப்பு விளக்கங்களை எழுத்துப் பூா்வமாக அளித்தனா். உரிய முறையில் விரிவான விசாரணை நடத்தப்பட்டு, சட்டப்படியான நடவடிக்கைகள் மேற்கொள்ளப்படும் என்றாா்.