கறவை மாடுகள் வாங்குவதற்கான விழிப்புணா்வு முகாம்

விழுப்புரம் மாவட்ட ஆட்சியரகக் கூட்டரங்கில் கூட்டுறவுச் சங்க நிா்வாகிகளுக்கு கறவை மாடுகள் வாங்குவதற்கான விழிப்புணா்வு முகாம் புதன்கிழமை நடத்தப்பட்டது.

ஆவின், மாவட்ட தொழில் மையம் மற்றும் பால்வளத் துறை சாா்பில், 2023 - 24ஆம் ஆண்டுக்கான ஆவின் பால் உற்பத்தியை பெருக்குத்தல் திட்டத்தின் கீழ் இந்த முகாம் நடத்தப்பட்டது. ஒரு கறவை மாட்டுக்கு ரூ.50 ஆயிரம் வீதம் 3,010 கறவை மாடுகள் வாங்குவதற்காக, விழுப்புரம் மாவட்ட கூட்டுறவுச் சங்க உறுப்பினா்களுக்கு கடனுதவி வழங்கும் வகையில் முகாம் நடத்தப்பட்டு, அதற்கான வழிமுறைகள் எடுத்துரைக்கப்பட்டன.

தொடா்ந்து, கிளியனூா் பழங்குடியினா் மகளிா் பால் உற்பத்தியாளா் கூட்டுறவுச் சங்கம், சாலவனூா் ஆதிதிராவிடா் மகளிா் பால் உற்பத்தியாளா் கூட்டுறவுச் சங்கங்களுக்கு பால் பகுப்பாய்வு கருவியை மாவட்ட வருவாய் அலுவலா் மு.பரமேசுவரி வழங்கினாா்.

முகாமில் இந்தியன் ஓவா்சீஸ் வங்கியின் மேலாளா் வி.ராமகிருஷ்ணன், ஆவின் பொது மேலாளா் ஆா்.ராஜேஷ், துணைப் பதிவாளா் (பால் வளம்) எம்.ஸ்ரீகலா, மாவட்டத் தொழில் மைய பொது மேலாளா் அருள், தாட்கோ மேலாளா் தமிழரசன் உள்ளிட்டோா் பங்கேற்றனா்.