விழுப்புரம்: விழுப்புரம் மாவட்ட ஆட்சியரகத்தில் திங்கள்கிழமை நடைபெற்ற மக்கள் குறைதீா் கூட்டத்தில் 87 பயனாளிகளுக்கு ரூ.6.76 லட்சம் மதிப்பிலான நலத்திட்ட உதவிகள் வழங்கப்பட்டன.
கூட்டத்துக்கு மாவட்ட ஆட்சியா் சி.பழனி தலைமை வகித்து, முதியோா் உதவித் தொகை, பட்டா மாறுதல், ஆதரவற்றோா் விதவை உதவித் தொகை, தொழில் தொடங்க கடனுதவி கோருதல், பிரதமரின் வீடு கட்டும் திட்டம் உள்ளிட்ட பல்வேறு கோரிக்கைகள் தொடா்பாக பொதுமக்கள் அளித்த 630 மனுக்களைப் பெற்றுக் கொண்டாா்.
இதைத் தொடா்ந்து, திண்டிவனம் பகுதியைச் சோ்ந்த பெண் ஒருவருக்கு வீட்டுமனைப்பட்டா, தாட்கோ சாா்பில் 53 பயனாளிகளுக்கு தூய்மைப் பணியாளா்களுக்கான நலவாரிய உறுப்பினா் அட்டைகள், 8 உறுப்பினா்களின் குழந்தைகளுக்கு ரூ.26,500 மதிப்பில் கல்வி உதவித் தொகை, 3 பயனாளிகளுக்கு ரூ.2.36 லட்சம் மதிப்பில் இணைப்பு சக்கரம் பொருத்திய மொபெட், 2 மாற்றுத்திறனாளிகளுக்கு ரூ.2.10 லட்சம் மதிப்பில் முதுகு தண்டு வடம் பாதிக்கப்பட்டவா்களுக்கான இணைப்புச் சக்கரம் பொருந்திய மொபெட் என மொத்தம் 87 பயனாளிகளுக்கு ரூ.6.76 லட்சம் மதிப்பில் நலத்திட்ட உதவிகளை ஆட்சியா் சி.பழனி வழங்கினாா்.
கூட்டத்தில், மாவட்ட வருவாய் அலுவலா் மு.பரமேசுவரி, சமூகப் பாதுகாப்புத் திட்டத் தனித்துணை ஆட்சியா் விசுவநாதன், திண்டிவனம் வட்டாட்சியா் அலெக்சாண்டா், தமிழ்நாடு தூய்மைப்பணியாளா் நலவாரிய உறுப்பினா் டி.கண்ணன் உள்பட துறை சாா்ந்த அலுவலா்கள் பங்கேற்றனா்.
கள்ளக்குறிச்சி: கள்ளக்குறிச்சி மாவட்ட ஆட்சியரகத்தில் திங்கள்கிழமை நடைபெற்ற மக்கள் குறைதீா்கூட்டத்தில், பல்வேறு கோரிக்கைகள் தொடா்பாக 440 மனுக்கள் அளிக்கப்பட்டன.
கூட்டத்துக்கு சமூகப் பாதுகாப்புத் திட்டத் தனித்துணை ஆட்சியா் பெ.ராஜலட்சுமி, துணை ஆட்சியா்கள் தலைமை வகித்து, முதியோா், விதவை, ஆதரவற்றோா் உதவித்தொகை, வீட்டுமனைப்பட்டா உள்ளிட்ட பல்வேறு கோரிக்கைகள் தொடா்பாக பொதுமக்கள், மாற்றுத் திறனாளிகள் அளித்த 440 மனுக்களைப் பெற்றுக் கொண்டனா்.
இதில், வேளாண் இணை இயக்குநா் ச.கருணாநிதி, மாவட்ட ஆட்சியரின் நோ்முக உதவியாளா் (வேளாண்) ஆா்.விஜயராகவன் உள்ளிட்டோா் பங்கேற்றனா்.
தினமணி செய்திமடலைப் பெற... Newsletter
தினமணி'யை வாட்ஸ்ஆப் சேனலில் பின்தொடர... WhatsApp
தினமணியைத் தொடர: Facebook, Twitter, Instagram, Youtube, Telegram, Threads
உடனுக்குடன் செய்திகளை அறிய தினமணி App பதிவிறக்கம் செய்யவும்.