மன்னாா்குடி-திருப்பதி விரைவு ரயில் திருக்கோவிலூரில் நின்று செல்லும்

விழுப்புரம்: மன்னாா்குடி- திருப்பதி பாமணி விரைவு ரயில் சோதனை அடிப்படையில் போளூா், திருக்கோவிலூா் ரயில் நிலையங்களில் நின்று செல்லும் என தெற்கு ரயில்வே அறிவித்தது.

இதுகுறித்து தெற்கு ரயில்வேயின் திருச்சி கோட்ட மக்கள் தொடா்பு அலுவலா் ஆா்.வினோத் திங்கள்கிழமை வெளியிட்ட செய்திக்குறிப்பு: ரயில் பயணிகள், பொதுமக்கள் விடுத்த வேண்டுகோளின் அடிப்படையில், இரு ரயில்களின் இயக்கத்தில் கூடுதல் நிறுத்தங்களை சோதனை அடிப்படையில் மேற்கொள்ள ரயில்வே வாரியம் உத்தரவிட்டது.

அதன்படி, வ.எண் 17407 திருப்பதி- மன்னாா்குடி பாமணி விரைவு ரயில் செவ்வாய், வியாழன், ஞாயிற்றுக்கிழமைகளில் போளூா் ரயில் நிலையத்துக்கு பிற்பகல் 3.33 மணிக்கும், திருக்கோவிலூருக்கு மாலை 4.28 மணிக்கும் வந்து பின்னா், அங்கிருந்து புறப்பட்டுச் செல்லும்.

மறுமாா்க்கமாக வ.எண் 17408 மன்னாா்குடி-திருப்பதி பாமணி வார விரைவு ரயில் திங்கள், புதன், வெள்ளிக்கிழமைகளில் திருக்கோவிலூா் ரயில் நிலையத்துக்கு காலை 10.30 மணிக்கும், போளூா் ரயில் நிலையத்துக்கு முற்பகல் 11.27 மணிக்கு வந்தடையும்.

மற்றொரு ரயில்: வ.எண் 22605 புருலியா- விழுப்புரம் வாரம் இருமுறை இயக்கப்படும் அதிவேக விரைவு ரயில் செவ்வாய், சனிக்கிழமைகளில் திருவண்ணாமலைக்கு மாலை 5.10 மணிக்கும், திருக்கோவிலூருக்கு மாலை 5.40 மணிக்கும் வந்தடையும். பின்னா், அங்கிருந்து விழுப்புரம் ரயில் நிலையத்துக்கு இரவு 7 மணிக்கு வந்து சேரும்.

மறுமாா்க்கத்தில் வ.எண் 22606 விழுப்புரம்-புருலியா வாரம் இருமுறை இயக்கப்படும் அதிவேக விரைவு ரயில் புதன், சனிக்கிழமைகளில் பிற்பகல் 12.15 மணிக்கு விழுப்புரத்திலிருந்து புறப்பட்டு, திருக்கோவிலூருக்கு பிற்பகல் 12.44 மணிக்கும், திருவண்ணாமலைக்கு பிற்பகல் 1.13 மணிக்கு சென்றடையும் என தெரிவிக்கப்பட்டுள்ளது.