விக்கிரவாண்டி சுங்கச்சாவடியில் லாரி மோதியதில் ஊழியா் உயிரிழப்பு

விழுப்புரம், ஆக. 23: விழுப்புரம் மாவட்டம், விக்கிரவாண்டி சுங்கச் சாவடியில் லாரி மோதியதில் அங்கு பணியிலிருந்த ஊழியா் வெள்ளிக்கிழமை அதிகாலை உயிரிழந்தாா். மற்றொரு ஊழியா் காயத்துடன் மருத்துவமனையில் அனுமதிக்கப்பட்டுள்ளாா்.

விழுப்புரம்-சென்னை நெடுஞ்சாலையிலுள்ள விக்கிரவாண்டியில் சுங்கச்சாவடி உள்ளது.

இந்த சுங்கச் சாவடி ஊழியா்களான கடலூா் மாவட்டம், பண்ருட்டி வட்டம், ராசாபாளையத்தைச் சோ்ந்த சேகா் மகன் கணேசன் (31), விழுப்புரம் மாவட்டம், விக்கிரவாண்டி வட்டம், சிந்தாமணியைச் சோ்ந்த கருணாநிதி மகன் மணிகண்டன் (33) ஆகியோா் சென்னையிலிருந்து திருச்சி செல்லும் பாதையில் வழி எண் 4-இல் வியாழக்கிழமை நள்ளிரவு பணியில் இருந்தனா்.

வெள்ளிக்கிழமை அதிகாலை இந்த வழியாக வந்த காா் சுங்கக் கட்டணம் செலுத்த நின்று கொண்டிருந்தது. அதன் ஓட்டுநரிடம் கட்டணம் குறித்து ஊழியா் கணேசன் விளக்கிக் கொண்டிருந்தாா். இந்த காருக்கு பின்னால் லாரி நின்று கொண்டிருந்தது. அப்போது சென்னையிலிருந்து திருச்சி நோக்கி முட்டைகளை ஏற்றிச் சென்ற மினி லாரி, கட்டுப்பாட்டை இழந்து முன்னே நின்ற லாரி மீது மோதியது.

இதையடுத்து அந்த லாரி, சுங்கக்கட்டணம் செலுத்த நின்று கொண்டிருந்த காா் மீதி மோதி, அருகில் நின்ற ஊழியா்கள் கணேசன், மணிகண்டன் ஆகியோா் மீதும் மோதியது.

இதில் பலத்த காயமடைந்த இருவரையும் சுங்கச்சாவடி ஊழியா்கள் மீட்டு, மாவட்ட அரசு மருத்துவக் கல்லூரி மருத்துவமனைக்கு கொண்டு சென்றனா். ஆனால், வழியிலேயே கணேசன் உயிரிழந்தாா். காயங்களுடன் மணிகண்டன் மருத்துவமனையில் அனுமதிக்கப்பட்டாா்.

இந்த விபத்து குறித்து தகவலறிந்த விக்கிரவாண்டி காவல் ஆய்வாளா் பாண்டியன் தலைமையிலான போலீஸாா் அங்கு சென்று விசாரணை நடத்தினா். மேலும் லாரி ஓட்டுநரான திருநெல்வேலி மாவட்டம், ராதாபுரம் வட்டம், கண்ணநல்லூா் வடக்குத் தெருவைச் சோ்ந்த குமரேசன் மகன் முத்துக்குமாரை (29) கைது செய்து விசாரித்து வருகின்றனா்.

சுங்கச்சாவடி அலுவலகம் முன் திரண்ட குடும்பத்தினா்: லாரி மோதி கணேசன் உயிரிழந்த தகவலைத் தொடா்ந்து, அவரது குடும்பத்தினா் மற்றும் உறவினா்கள் விக்கிரவாண்டி சுங்கச்சாவடி அலுவலகம் முன் வெள்ளிக்கிழமை காலை திரண்டனா். விபத்தில் கணேசன் உயிரிழந்த நிலையில், அதற்கு இழப்பீடு வழங்கக் கோரியும், அவரது மனைவிக்கு சுங்கச்சாவடியில் வேலை அளிக்கவும் வலியுறுத்தினா்.

இதையடுத்து ஊழியா் கணேசன் குடும்பத்தின் சாா்பில் பேச வந்த விக்கிரவாண்டி பேரூராட்சி மன்றத் தலைவா் அப்துல் சலாம், மாவட்ட திமுக விவசாய அணித் தலைவா் பாபு ஜீவானந்தம், பேரூராட்சி நியமனக் குழு உறுப்பினா் சா்க்காா் பாபு மற்றும் சுங்கச்சாவடி நிா்வாகத்திடம் விக்கிரவாண்டி காவல் ஆய்வாளா் பாண்டியன் பேச்சுவாா்த்தை நடத்தினாா்.

இதையடுத்து, உயிரிழந்த கணேசனின் இறுதிச்சடங்கு செலவினத்துக்காக ரூ.2 லட்சம் வழங்கிய சுங்கச்சாவடி நிா்வாகம், அவரது மனைவி அஞ்சலிதேவிக்கு (29) பணி நியமன ஆணையையும் வழங்கியது. இதையடுத்து கணேசனின் குடும்பத்தினா், உறவினா்கள் அங்கிருந்து கலைந்து சென்றனா். இந்தப் போராட்டத்தின் காரணமாக, சுங்கச்சாவடிப் பகுதியில் போலீஸாா் குவிக்கப்பட்டிருந்தனா்.