மாருதி சுஸுகி விற்பனையில் சாதனை வளர்ச்சி

நாட்டின் மிகப் பெரிய கார் தயாரிப்பு நிறுவனமான மாருதி சுஸுகியின் ஜூலை மாத விற்பனை 21 சதவீத வளர்ச்சி பெற்றதாக அறிவிக்கப் பட்டுள்ளது. கடந்த மாதம் விற்பனையான வாகன எண்ணிக்கை 1,65,346 ஆகும். அந்த நிறுவனத்தின் வரலாற்றிலேயே மாத விற்பனையில் இது சாதனை அளவாகும்.
மாருதி சுஸுகி செவ்வாய்க்கிழமை வெளியிட்ட அறிக்கையில் தெரிவித்திருப்பது: கடந்த ஜூலை மாதம் உள்நாட்டில் விற்பனை எண்ணிக்கை 22 சதவீதம் வளர்ச்சி பெற்று, 1,54,001 ஆக இருந்தது. ஆல்டோ, வேகன்-ஆர் உள்ளிட்ட மினி ரக கார்களின் விற்பனை 20 சதவீதம் உயர்வு பெற்று 42,310 ஆக இருந்தது.
ஸ்விஃப்ட், எஸ்டிலோ, டிஸையர், பலேனோ, இக்னிஸ் உள்ளிட்ட காம்பாக்ட் பிரிவில் 25 சதவீத வளர்ச்சி காணப்பட்டது. அந்தப் பிரிவில் விற்பனை எண்ணிக்கை 63,116 ஆகும். சியாஸ் உள்ளிட்ட செடான் கார்கள் விற்பனை 23 சதவீதம் அதிகரித்தது. எர்டிகா, எஸ்-கிராஸ், விடாரா, பிரெஸ்ஸா உள்படும் எஸ்யுவி ரக வாகன விற்பனை 48 சதவீதம் அதிகரித்தது. ஆம்னி, ஈக்கோ ஆகிய வேன் மாடல்களின் மொத்த விற்பனை 15,714 ஆகும்.
ஜூலை மாத மொத்த வாகன விற்பனை 21 சதவீத வளர்ச்சி பெற்றது. விற்பனையான வாகனங்களின் எண்ணிக்கை 1,65,346. இது நிறுவனத்தின் வரலாற்றில் சாதனை அளவாகும். ஜூலை மாதம் ஏற்றுமதியான வாகனங்களின் எண்ணிக்கை 11,345 ஆக இருந்தது என்று மாருதி சுஸுகி வெளியிட்ட அறிக்கையில் தெரிவிக்கப்பட்டுள்ளது.