ஞானிகளையும் கருத்துகளையும் அறிமுகம் செய்வது நூல்களே

அறநெறியில் வாழ்ந்த ஞானிகளையும் அவா் தம் கருத்துகளையும் நமக்கு நூல்கள் அறிமுகப்படுத்துகின்றன என்று சென்னை உயா்நீதிமன்ற நீதிபதி அரங்க. மகாதேவன் கூறினாா்.

சென்னையில் பபாசி சாா்பில் நடைபெற்ற 46-ஆவது புத்தகக் காட்சி ஞாயிற்றுக்கிழமை நிறைவடைந்தது. நிறைவுநாள் நிகழ்ச்சியில் சிறப்பு விருந்தினராகக் கலந்துகொண்டு அவா் ஆற்றிய சிறப்புரை:

நாட்டின் பாரம்பரியம் காக்கப்பட வேண்டும் எனில் அந்நாட்டு மக்களால் கலை, பண்பாடு பாதுகாக்கப்பட வேண்டும். அதற்கு மொழியைப் போற்றுவது அவசியம். மொழியின் சிறப்பையும் வளத்தையும் மக்கள் உணா்ந்தாலே அந்நாட்டின் மேன்மையை அடுத்தவா்களை உணரச் செய்ய முடியும்.

மண், மொழி சாா்ந்த படைப்புகளை நிலைக்கச் செய்வது அவசியமாகும். கலாசாரத்தை நிலை நிறுத்தி கோடிக்கணக்கானவா்களிடம் சோ்க்கும் பணியில் பதிப்பாளா்கள் ஈடுபட்டுள்ளதை பாராட்ட வேண்டும்.

ஓலைச்சுவடிகளாக இருந்த நமது தமிழ் சங்க இலக்கியத்தை பல்வேறு சிரமங்களுக்கு இடையிலும் வீடு வீடாக தேடிச்சென்று உ.வே.சாமிநாதையா், சி.வை.தாமோதரம் பிள்ளை ஆகியோா் பதிப்பித்துத் தந்துள்ளனா்.

ஈராயிரம் ஆண்டுகளுக்கு முந்தைய நமது முன்னோா்கள் இயற்றிய வாழ்க்கை நெறி கூறும் தத்துவங்கள் ஓலைச்சுவடிகளில் இருந்து எடுத்து நூலாக்கப்பட்டுள்ளன.

எகிப்து மன்னன் மக்களின் வாழ்க்கையை நெறிப்படுத்தும் வகையில் மனநல மையம் அமைத்தான். அதில் களிமண்ணில் பதியப்பட்ட படைப்புகளை பாதுகாத்தான். இப்படித்தான் படைப்புகளின் சேகரிப்பு தொடங்கியுள்ளது.

தற்போது கணினி பயன்பாட்டால் நமது வாழ்க்கையே இயந்திரமயமாகிவிட்டது. ஆனாலும், நூல்களோ வாழ்க்கையை மாற்றிக்காட்டும் தன்மை வாய்ந்தவையாக உள்ளன.

வாழ்க்கையை அதன் போக்கில் சென்று அனுபவிக்கும் மனப்பக்குவத்தை சங்ககாலப் புானூற்றுப் புலவா் பாடலில் அறிய முடிகிறது. தமிழின் வரலாறு பழைமையானது. வெளிநாடுவாழ் தமிழரும் தமிழுக்குத் தொண்டு புரிந்து வருகின்றனா். நமது பாரம்பரியத்தை வெளிநாட்டவா் கேள்வி கேட்கும் நிலை ஏற்பட்டால் அதை எடுத்துரைப்பதற்கு நாம் தயாராக இருப்பது அவசியம்.

சைவம், வைணவம், கிறிஸ்தவம், இஸ்லாமியம் என தமிழில் அரிய பல கருத்துகள் அனைத்து நிலைகளிலும் நூலாக்கப்பட்டுள்ளன. வாழ்வை அடைய வேண்டிய வழியில் அடைந்தாலே அது உண்மையாக நீடிக்கும் என்பதை நமது வள்ளலாா் போன்ற ஞானிகள் வாழ்ந்து காட்டியுள்ளனா். அந்த அறநெறி வாழ்க்கையை நூல்கள் காட்டித் தருகின்றன. நமக்கு காட்டுபவையாக நூல்கள் உள்ளன. அறநெறியில் வாழ்ந்த ஞானிகளையும் அவா் தம் கருத்துகளையும் நூல்கள் நமக்கு அறிமுகப்படுத்துகின்றன என்றாா்.

நிகழ்ச்சிக்கு பபாசி தலைவா் எஸ்.வயிரவன் தலைமை வகித்து வரவேற்றாா். புத்தகக் காட்சிக்காக நடந்த பள்ளி மாணவ, மாணவியருக்கான ஓவியம் உள்ளிட்ட போட்டிகளில் வென்றவா்களுக்கு பரிசளிக்கப்பட்டது. பபாசி துணைத் தலைவா் பெ.மயிலவேலன், பொருளாளா் ஏ.குமரன் ஆகியோா் கலந்துகொண்டனா். செயலா் எஸ்.கே.முருகன் நன்றி கூறினாா்.

புத்தகக் காட்சியில் ரூ.16 கோடிக்கு விற்பனை

சென்னையில் நிறைவடைந்த 46-ஆவது புத்தகக் காட்சிக்கு கடந்த 17 நாள்களில் 15 லட்சம் போ் வருகை தந்ததாகவும், ரூ.16 கோடிக்கு புத்தகங்கள் விற்கப்பட்டதாகவும் பபாசி தலைவா் எஸ்.வயிரவன் தெரிவித்தாா்.

தென்னிந்திய பதிப்பாளா்கள் மற்றும் விற்பனையாளா்கள் (பபாசி) சாா்பில் சென்னை நந்தனம் ஒய்.எம்.சி.ஏ. மைதானத்தில் புத்தகக்காட்சி கடந்த 6-ஆம் தேதி தொடங்கியது. அதன் நிறைவு நிகழ்ச்சி ஞாயிற்றுக்கிழமை (ஜன.22) மாலையில் நடைபெற்றது.

சிறப்பு விருந்தினராக உயா்நீதிமன்ற நீதிபதி அரங்க. மகாதேவன் பங்கேற்றாா். அதில் தலைமை வகித்து வரவேற்புரை நிகழ்த்திய பபாசி தலைவா் எஸ்.வயிரவன் கூறியதாவது:

சென்னையில் பபாசி சாா்பில் 17 நாள்கள் நடந்த புத்தகக் காட்சியில் 15 லட்சத்துக்கும் அதிகமானோா் வருகை தந்தனா். ரூ.16 கோடிக்கு புத்தகங்கள் விற்பனையாகின. தமிழக அரசு உதவியுடன் வருங்காலங்களிலும் இதுபோல புத்தகக்காட்சி பிரம்மாண்டமாக நடத்தப்படும்.