ஹிந்தி ரசிகர்கள் கொடுத்த அன்பு...: விஜய் சேதுபதி

நடிகர் விஜய்சேதுபதி, பாலிவுட் திரையுலகத்திற்கு சென்றபோது சில படங்களோடு தனது வாய்ப்பு அங்கு முடிந்துவிடும் என நினைத்ததாகவும் ஹிந்தி ரசிகர்கள் தன்னை வரவேற்றதை தான் எதிர்பார்க்கவில்லை எனவும் அவர் தெரிவித்துள்ளார்.

தான் பேசும் ஹிந்தி சமூக வலைதளங்களில் விமர்சிக்கப்படும் எனக் கருதியதாகவும் ஆனால் தான் நினைத்ததற்கு மாறாக நடந்ததாகவும் அனுபவங்களைப் பகிர்ந்துள்ளார் விஜய் சேதுபதி.

இயக்குநர் ஸ்ரீராம் ராகவன் இயக்கத்தில் விஜய் சேதுபதி, கத்ரீனா கைஃப், ராதிகா சரத்குமார் என பலர் நடித்துள்ள மெரி கிறிஸ்துமஸ் ஜன.12 தமிழ் மற்றும் ஹிந்தியில் வெளியாகவுள்ளது.

‘பீட்சா’. ‘96’, ‘விக்ரம் வேதா’ மற்றும்  ‘மாஸ்டர்’ உள்ளிட்ட படங்கள் மூலம் ஹிந்தி ரசிகர்களுக்கு விஜய் சேதுபதி ஏற்கெனவே அறிமுகமாகியிருந்தாலும் பார்ஸி மற்றும் ஷாரூக் கானின் ‘ஜவான்’ அவரை இன்னும் அதிகமான பாலிவுட் சினிமா ரசிகர்களிடம் கொண்டு சேர்த்துள்ளது.

‘ஏக் ஹசீனா தி’, ‘பத்லாபூர்’ மற்றும் ‘அந்தாதுன்’ படங்களை இயக்கிய இயக்குநர் ஸ்ரீராம் ராகவன் உடன் பணிபுரிவது தனக்கு மிகவும் விருப்பத்துக்குரியதாக இருந்ததாக விஜய் சேதுபதி தெரிவித்துள்ளார்.

இதையும் படிக்க: சந்தானத்தின் வடக்குப்பட்டி ராமசாமி: வெளியீட்டுத் தேதி அறிவிப்பு

பார்ஸி, ஜவான் கொடுத்த நம்பிக்கை இன்னும் அதிகமான இயக்குநர்கள் மற்றும் எழுத்தாளர்கள் தன்னை யோசித்து கதை எழுதுவதற்கான வாய்ப்பைக் கொடுத்துள்ளதாக அவர் குறிப்பிட்டார்.