முழுசா நம்பி நாராயணனா மாறி இருக்குற நம்ப மாதவனைப் பாருங்க!

மாதவன் தனது இன்ஸ்டாகிராமில் அண்மையில் வெளியிட்ட புகைப்படங்கள் அவரது ரசிகர்களை பெரிதும் கவர்ந்துள்ளது.

'இயக்குநர் - மாதவன்' என்ற க்ளாப் போர்டை தனது இன்ஸ்டராகிராமில் பதிவிட்டுள்ளார் மாதவன். இதன் சுவாரஸ்யமான பின்னணி என்ன?

விஞ்ஞானி நம்பி நாராயணனின் வாழ்க்கையை தமிழ், தெலுங்கு, ஹிந்தி என மும்மொழிகளில் 'ராக்கெட்ரி - தி நம்பி எஃபெக்ட்' என்ற பெயரில் படமாக்கம் செய்து வருகிறார்கள்.

இப்படத்தை ஆனந்த் மகாதேவன் இயக்க நம்பி நாராயணன் வேடத்தில் தாம் நடிக்கவுள்ளதாக கடந்த ஆண்டு தனது இன்ஸ்டாகிராம் பக்கத்தில் ரசிகர்களிடம் விடியோவாகவே பகிர்ந்திருந்தார் மாதவன். இப்படத்தில் இணை இயக்குநராகவும் அவர் பணியாற்றவிருக்கிறார் என்ற செய்தியும் வெளியானது.

இஸ்ரோவில் க்ரையோஜெனிக்ஸ் பிரிவில் மூத்த அதிகாரியாக பணிபுரிந்தவரும், திரவ எரிபொருளைப் பயன்படுத்தி ராக்கெட் அனுப்பும் திட்டத்தை வடிவமைத்தவருமான விஞ்ஞானி நம்பி நாராயணனாக நடிப்பதில் பெருமை கொள்வதாக இன்ஸ்டா பதிவில் கூறிய மாதவன், ‘நீங்கள் இருக்கும் இடத்தை நான் அடைவது கடினம், ஆனால் உங்களைப் போன்ற தோற்றத்தில் காட்சி அளிக்க முயல்கிறேன் நிச்சயம் அதைச் சிறப்பாக செய்வேன்’ என்று குறிப்பிட்டிருந்தார். நம்பி நாராயணன் தோற்றத்துக்காக மாதவன் 14 மணி நேரம் மேக் அப் போடுகிறார் என்பது குறிப்பிடத்தகுந்தது. 

இயக்குநர் ஆனந்த் மகாதேவன் இப்படத்திலிருந்து சில காரணங்களால் விலகவே, இணை இயக்குநராக பணியாற்றிய மாதவன் இயக்குநராகிவிட்டார். தற்போது 'ராக்கெட்ரி - தி நம்பி எஃபெக்ட்' படத்தை அவரே தொடர்ந்து இயக்குகிறார்.

நீண்ட இடைவெளிக்குப் பிறகு, இந்தப் படத்தில் மாதவனுடன் நடிக்கிறார் சிம்ரன். இதன் படப்படிப்பு இந்தியாவில் மட்டுமல்லாமல் ஃப்ரான்ஸ், ரஷ்யா, ஸ்காட்லாந்து உள்ளிட்ட வெளிநாடுகளிலும் எடுக்க உள்ளனர்.