அர்ஜூன் ரெட்டி என்கிற தெலுங்குப் படம் 2017-ல் வெளியாகி அனைவருடைய கவனத்தையும் ஈர்த்தது. விஜய் தேவரகொண்டா, ஷாலினி பாண்டே நடிப்பில் சந்தீப் வங்கா இயக்கிய படத்துக்கு நல்ல விமரிசனங்கள் கிடைத்தது மட்டுமல்லாமல் வசூலிலும் அசத்தியது.
இந்தப் படம் தமிழில் வர்மா என்கிற பெயரில் ரீமேக் ஆனது. பிரபல இயக்குநர் பாலா இயக்கினார். விக்ரம் மகன் துருவ் கதாநாயகனாக இப்படத்தின் மூலமாக அறிமுகமானார். வங்காள நடிகையான மேகா செளத்ரி, துருவ் ஜோடியாக நடித்தார். ஈஸ்வரி ராவ், பிக் பாஸ் ரைஸா போன்றோரும் இப்படத்தில் நடித்தார்கள். இயக்குநர் ராஜூ முருகன் வசனம் எழுதினார். அர்ஜூன் ரெட்டி படத்துக்கு இசையமைத்த ரதன், வர்மா படத்துக்கும் இசையமைத்தார். இது அவருடைய 4-வது தமிழ்ப்படம். விகடகவி, வாலிபராஜா, டார்லிங் 2 ஆகிய படங்களுக்கு ரதன் இசையமைத்துள்ளார். பிப்ரவரி 14 அன்று வெளிவருவதாக இருந்த வர்மா படம் திடீரென கைவிடப்பட்டது. படத்தின் இறுதி வடிவம் குறித்து பாலா - தயாரிப்பாளர் இடையே கருத்துவேறுபாடு ஏற்பட்டதால் இந்த நிலை உருவானது. இயக்குநர் உள்ளிட்ட புதிய படக்குழுவினரும் கதாநாயகியும் விரைவில் அறிவிக்கப்படுவார்கள் என்று அறிவிக்கப்பட்டது.
அர்ஜூன் ரெட்டி தமிழ் ரீமேக்குக்கு, கடந்த வருடம் வெளியான ஹிந்திப் படமான அக்டோபர் படத்தில் அறிமுகமாகிக் கவனம் பெற்ற பனிதா சந்து கதாநாயகியாகத் தேர்வானார். பனிதா, லண்டனில் பிறந்த பஞ்சாபி குடும்பத்தைச் சேர்ந்தவர்.
இந்நிலையில் வர்மா படத்தை மீண்டும் இயக்கும் வேலைகளில் ஈ4 எண்டர்டெயிண்ட்மெண்ட் நிறுவனம் வேகவேகமாகக் களமிறங்கியுள்ளது. படத்துக்குப் புதிய தலைப்பும் படக்குழுவினரையும் முடிவு செய்து அதை அதிகாரபூர்வமாக அறிவித்துள்ளது.
வர்மா என்கிற தலைப்பு தற்போது, ஆதித்ய வர்மா என மாற்றப்பட்டுள்ளது. சந்தீப் வங்காவிடம் உதவி இயக்குநராகப் பணியாற்றிய கிரீசாயா இப்படத்தின் மூலம் இயக்குநராக அறிமுகமாகிறார். ஏழாம் அறிவு படத்துக்குப் பிறகு ரவி கே. சந்திரன் தமிழில் மீண்டும் ஒளிப்பதிவாளராகப் பணியாற்றவுள்ளார். மேலும் வர்மா படத்தில் நடித்த ரைஸா வில்சனுக்குப் பதிலாக ப்ரியா ஆனந்த் நடிக்கவுள்ளார். மேலும் வர்மா படத்துக்கு இசையமைத்த ரதன் இப்படத்துக்கும் இசையமைக்கவுள்ளார்.
இதன்மூலம் வர்மா படத்தை மீண்டும் இயக்கும் தனது முடிவில் உறுதியாக உள்ள ஈ4 எண்டர்டெயிண்ட்மெண்ட், புதிய படக்குழுவையும் தற்போது உறுதி செய்துவிட்டது. இதையடுத்து விரைவில் ஆதித்ய வர்மா-வின் படப்பிடிப்பு தொடங்கும் என எதிர்பார்க்கப்படுகிறது.