மூக்குத்தி அம்மன் படத்தில் பாடியுள்ள எல்.ஆர். ஈஸ்வரி: ஏ.ஆர். ரஹ்மான் பாராட்டு

அம்மன் வேடத்தில் பிரபல நடிகை நயன்தாரா நடித்துள்ள படம் - மூக்குத்தி அம்மன். இப்படத்தை ஆர்ஜே பாலாஜியும் என்ஜே சரவணனும் இணைந்து இயக்கியுள்ளார்கள். 

டிஸ்னி ஹாட்ஸ்டார் ஓடிடி தளத்தில் நவம்பர் 14 அன்று மூக்குத்தி அம்மன் படம் வெளியாகும் என அறிவிக்கப்பட்டுள்ளது.

இந்நிலையில் இப்படத்தில் இடம்பெற்றுள்ள அம்மன் பாடல் ஒன்று சமீபத்தில் வெளியிடப்பட்டது. மூக்குத்தி அம்மனுக்குப் பொங்க வைப்போம் என்கிற இந்தப் பாடலை மூத்த பாடகி எல்.ஆர். ஈஸ்வரி பாடியிருந்தார். இசை - கிரிஷ் கோபாலகிருஷ்ணன், பாடல் - பா. விஜய்.

நீண்ட நாள் கழித்து திரைப்படம் ஒன்றில் பின்னணிப் பாடலைப் பாடியுள்ள எல்.ஆர். ஈஸ்வரியைக் குறிப்பிட்டு பிரபல இசையமைப்பாளர் ஏ.ஆர். ரஹ்மான் ட்வீட் வெளியிட்டுள்ளார். அவர் கூறியதாவது

எல்.ஆர். ஈஸ்வரி அம்மா மீண்டும் பாட வந்தது ஆச்சர்யப்படுத்தியுள்ளது என்று எழுதியுள்ளார்.

கடைசியாக, ஆர்ஜே பாலாஜி நடித்த எல்கேஜி படத்தில் எல்.ஆர். ஈஸ்வரி பாடியிருந்தார்.