எம்எஸ் தோனி - தி அன்டோல்ட் ஸ்டோரி படத்தைத் தனது குடும்பத்தினர் அனைவரும் ஒன்றாகச் சேர்ந்து பார்க்க வேண்டும் என சுசாந்த் சிங் விரும்பியதாக அவருடைய சகோதரி ஸ்வேதா சிங் கூறியுள்ளார்.
கிரிக்கெட் வீரர் தோனியின் கிரிக்கெட் வாழ்க்கையை மையமாக முன்வைத்து உருவாக்கப்பட்ட படம், எம்எஸ் தோனி - தி அன்டோல்ட் ஸ்டோரி. தோனி வேடத்தில் சுசாந்த் சிங் ராஜ்புத் நடித்தார். இயக்கம் - நீரஜ் பாண்டே. இந்தப் படம், 2016 செப்டம்பர் 30-ம் தேதி வெளியானது.
திரைத்துறை மீதான ஆா்வத்தில் பொறியியல் படிப்பை பாதியில் கைவிட்ட சுசாந்த் சிங் ராஜ்புத், நடனம் மற்றும் நடிப்புக் கலைகளை முறைப்படி கற்று, திரைத் துறைக்குள் நுழைந்தாா். ஆரம்பத்தில் நடனக் கலைஞராகவும், சிறிய வேடங்களிலும் நடித்து வந்த அவா், 2013-இல் ‘காய் போ சே’ திரைப்படம் மூலம் நடிகராக அறிமுகமானாா். அதன் பிறகு, ‘சுத் தேசி ரொமான்ஸ்’, ‘ராப்டா’, ‘கேதா்நாத்’, சொன்சிரியா’ உள்ளிட்ட படங்களில் நடித்த அவா், கிரிக்கெட் வீரா் எம்.எஸ். தோனியின் வாழ்க்கை வரலாறு படத்தில் கதாநாயகனாக நடித்ததன் மூலம் மிகவும் பிரபலமானாா்.
சுசாந்த் சிங், மும்பை பந்த்ரா புகா் பகுதியில் அமைந்துள்ள அவருடைய அடுக்குமாடி குடியிருப்பில் கடந்த ஜூன் 14-ஆம் தேதி தூக்கில் தொங்கிய நிலையில் உயிரிழந்து கிடந்தாா். சுசாந்த் சிங்கின் மரண வழக்கை சிபிஐ விசாரிக்க உச்சநீதிமன்றம் உத்தரவிட்டது. இதையடுத்து சிபிஐ சிறப்புக் குழு, விசாரணையைத் தொடங்கியுள்ளது.
இந்நிலையில் சுசாந்த் சிங் சகோதரி ஸ்வேதா சிங் கூறியதாவது:
2016 அக்டோபரில், என்னை அமெரிக்கவிலிருந்து சுசாந்த் சிங் வரச் சொன்னார். தோனி படத்தை அனைவரும் ஒன்றாகத் திரையரங்கில் பார்க்க விரும்பினார். இதைக் கேட்டு நான் மிகவும் பெருமையடைந்தேன். அடுத்த விமானத்தைப் பிடித்து இந்தியாவுக்கு வந்து, சுசாந்தின் வெற்றியை அனைவரும் ஒன்றாகச் சேர்ந்து கொண்டாடினோம் என்றார்.