வெந்து தணிந்தது காடு வெற்றி: கமல் பாணியை பின்பற்றிய ஐசரி கணேஷ்

வெந்து தணிந்தது காடு திரைப்படத்தின் வெற்றியை அதன் தயாரிப்பாளர் ஐசரி கணேஷ், கமல்ஹாசன் பாணியில் கொண்டாடி மகிழ்ந்துள்ளார்.

கௌதம் மேனன் இயக்கத்தில் சிம்பு நடிப்பில் கடந்த 18ஆம் தேதி திரையரங்குகளில் வெளியான படம் 'வெந்து தணிந்தது காடு'. இந்த படம் கலவையான விமர்சனங்களைப் பெற்று வந்தாலும் வசூலில் குறைவைக்கவில்லை. படம் வெளியான முதல் நான்கு நாள்களிலேயே ரூ.50 கோடிகளுக்கு மேலாக வசூலித்ததாக தகவல் வெளியானது. வேல்ஸ் ஃபிலிம் இண்டர்நேஷனல் சார்பாக ஐசரி.கே. கணேஷ் தயாரித்துள்ள இந்தப் படத்தில் சிம்புவுக்கு ஜோடியாக சித்தி இத்னானி நடித்துள்ளார்.

இதையும் படிக்க- “தெரியாம பதிவிறக்கம் செய்துவிட்டேன்” கதறி அழுத சீரியல் நடிகை -நடந்தது என்ன?

ராதிகா முக்கிய வேடத்தில் நடித்துள்ளார். சித்தார்த்தா நுனி இந்தப் படத்துக்கு ஒளிப்பதிவு செய்ய, எழுத்தாளர் ஜெயமோகன் இந்தப் படத்திற்கான கதையை எழுதியுள்ளார். இந்த நிலையில் வெந்து தணிந்தது காடு திரைப்படத்தின் வெற்றியைத் தொடர்ந்து தயாரிப்பாளர் ஐசரி கணேஷ் நடிகர் சிம்புவுக்கு ரூ.92 லட்சம் மதிப்புள்ள காரையும், இயக்குநர் கௌதம் வாசுதேவ் மேனனுக்கு ராயல் என்ஃபீல்டு பைக்கையும் பரிசளித்துள்ளார். தற்போது இந்த புகைப்படங்கள் இணையத்தில் வைரலாகி வருகின்றன. 

முன்னதாக விக்ரம் திரைப்படம் வெற்றி பெற்றதால் அதன் இயக்குநர் லோகேஷ் கனகராஜ் உள்ளிட்டோருக்கு நடிகர் கமல்ஹாசன் பரிசுகளை வழங்கி மகிழ்வித்தார். தற்போது அதே பாணியில் தன்னுடைய படத்தின் வெற்றியையும் ஐசரி கணேஷ் கொண்டாடி மகிழ்ந்துள்ளார்.