நீண்ட இடைவேளைக்கு பிறகு இயக்குநர் அமீர் ஒரு படத்தை இயக்கவிருக்கிறார். இதற்காக புகைப்படத்துடன் கூடிய அதிகாரப்பூர்வ அறிவிப்பு தற்போது வெளியாகியுள்ளது. இந்தப் புகைப்படத்தில் வெற்றிமாறன் மற்றும் அமீருடன் இயக்குநர் தங்கம் இருக்கிறார்.
இதில் இயக்குநர் தங்கம், வெற்றிமாறனுடன் இயக்குநர் பாலுமகேந்திராவிடம் உதவி இயக்குநராக பணிபுரிந்தவர். இவர் தனக்கு அண்ணன் போன்றவர் என பல பேட்டிகளில் வெற்றிமாறன் தெரிவித்துள்ளார். தற்போது வெற்றிமாறனுடன் இணைந்து பணியாற்றி வருகிறார்.
இதையும் படிக்க | ஐஸ்வர்யா ரஜினிகாந்த்துக்கு கரோனா: மருத்துவமனையில் அனுமதி
தற்போது அமீர் இயக்கும் இந்தப் படத்துக்கு வெற்றிமாறன் வசனம் எழுதவிருப்பதாக கூறப்படுகிறது. இந்தப் படத்தில் சூரி நாயகனாக நடிக்கவிருப்பதாக சில நாட்களுக்கு முன்பு தகவல் பரவியது.
ஆனால் இதுகுறித்து அதிகாரப்பூர்வ தகவல் வந்தால்தான் இது எந்த அளவுக்கு உண்மை என்பது தெரியவரும். வெற்றிமாறன் இயக்கி வரும் விடுதலை படத்தில் சூரி கதாநாயகனாக நடித்து வருகிறார்.
வெற்றிமாறன் இயக்கிய 'வட சென்னை' படத்தில் ராஜன் என்ற வேடத்தில் அமீர் கலக்கியிருந்தார். இதனையடுத்து மீண்டும் இருவரும் இணையவிருப்பது ரசிகர்களிடையே மகிழ்ச்சியை ஏற்படுத்தியுள்ளது.