அய்யப்பனும் கோஷியும் திரைப்படத்திற்காக தேசிய விருது பெற்ற பாடகி நஞ்சம்மா தமிழிலும் அறிமுகமாகவுள்ளார்.
இயக்குநர் சச்சி இயக்கத்தில் பிரிதிவிராஜ், பிஜு மேனன் நடிப்பில் 2020-ம் ஆண்டு வெளியான மலையாளப் படமான அய்யப்பனும் கோஷியும் ஏராளமான ரசிகர்களின் பாராட்டைப் பெற்றதுடன் 4 தேசிய விருதுகளையும் பெற்று அசத்தியது.
குறிப்பாக, அப்படத்தில் இடம்பெற்ற ‘களக்காத்த சந்தன மேரம்’ பாடலைப் பாடிய நஞ்சம்மாவின் குரல் தென்னிந்திய சினிமா ரசிகர்களை அதிகளவில் ஈர்த்தது. பழங்குடியான நஞ்சம்மா மேடைக் கச்சேரிகளில் பாடல்களைப் பாடிவந்துள்ளார். ஆனால், அய்யப்பனும் கோஷியும் படம் அவரை சினிமா உலகில் பெரிதாக அறிமுகப்படுத்தியது.
இதையும் படிக்க: நடிகராக களமிறங்கிய கிரிக்கெட் வீரர் தவான்
அதனைத் தொடர்ந்து மலையாளத்தில் செக்கன், ஸ்டேசன் 5 உள்ளிட்ட படங்களில் சில பாடல்களைப் பாடினார்.
இந்நிலையில், மலையாள இயக்குநர் சமர் இயக்கத்தில் உருவாகிவரும் ‘சீன் நம்பர் 62’ என்கிற தமிழ்ப் படத்தில் பாடகர் வேல்முருகனுடன் இணைந்து ‘என் சேவல்’ என்கிற தமிழ் பாடலை நஞ்சம்மா பாடியுள்ளதாக தகவல் வெளியாகியுள்ளது.
இப்படத்தின் படப்பிடிப்பும் வேகமாக நடைபெற்று வருவதால் விரைவில் நஞ்சம்மாவின் குரலில் ஒரு தமிழ்ப் பாடலைக் கேட்கலாம்.