வெந்து தணிந்தது காடு திரைப்படத்தைப் பார்க்க வந்த பிரபல நகைச்சுவை நடிகருக்கு சிம்பு ரசிகர்கள் மாலை அணிவித்து தண்ணீர் ஊற்றி தங்களின் ஆரவாரத்தை வெளிப்படுத்தினர்.
விண்ணைத் தாண்டி வருவாயா, அச்சம் என்பது மடைமையடா வெற்றிகளுக்குப் பிறகு 3-வது முறையாக இயக்குநர் கௌதம் வாசுதேவ மேனன், சிம்பு, ஏ.ஆர்.ரஹ்மான் கூட்டணியில் உருவான ‘வெந்து தணிந்தது காடு’ இன்று திரையரங்குகளில் வெளியாகியுள்ளது.
இப்படத்தை சிம்பு ரசிகர்கள் பெரிதும் எதிர்பார்த்திருந்தனர். இந்நிலையில், அதிகாலைக் காட்சிக்கு சிம்புவின் நண்பரும் நகைச்சுவை நடிகருமான கூல் சுரேஷ் திரையரங்கம் வந்திருந்தார்.
இதையும் படிக்க: விருதுகளைக் குவிக்கும் ‘ஸ்குவிட் கேம்’
அப்போது, மகிழ்ச்சியில் ரசிகர் ஒருவர் கூல் சுரேஷின் ஆடி காரின் முகப்புக் கண்ணாடியில் ஏறி அமர்ந்ததால் அதிக எடையால் கண்ணாடி உடைந்தது.
பின்னர், வருத்தமாக உள்ளே சென்ற கூல் சுரேஷ் படம் முடித்து வெளியே வந்ததும் சிம்பு ரசிகர்கள் அவருக்கு மாலை அணிவித்து தண்ணீரை ஊற்றி அபிஷேகம் செய்வதுபோல் தங்களுடைய நன்றியைத் தெரிவித்துள்ளனர்.
தற்போது அந்த விடியோ வைரலாகி வருகிறது.
‘கூல் சுரேஷ்’ கடந்த சில மாதங்களாகவே வெந்து தணிந்தது காடு படத்திற்காக தொடர்ந்து குரல் கொடுத்து வந்ததாலும் அனைத்து படங்களுக்கும் தன் நகைச்சுவையான கருத்துக்களைச் சொல்வதாலும் ரசிகர்கள் மத்தியில் புகழ்பெற்றவர். குறிப்பாக அவருடைய ‘வெந்து தணிந்தது காடு ..சிம்புவுக்கு வணக்கத்தைப் போடு’ வசனம் அதிக முறை டிரெண்ட் ஆனது.