சொல்ல ஒன்றுமில்லை... நடிகை ஸ்வாதி விவாகரத்து?

தெலுங்கு நடிகையான ஸ்வாதி ரெட்டி தமிழில் ’சுப்ரமணியபுரம்’ படத்தின் மூலம் நாயகியாக அறிமுகமானார். அதன்பின், ’கனிமொழி’, ‘போராளி’, ‘வடகறி’ ஆகிய படங்களில் நடித்து கவனம் ஈர்த்தவர் மெல்ல மெல்ல மார்க்கெட் இழந்து நடிப்பதிலிருந்து விலகிக்கொண்டார். 

தமிழ், தெலுங்கு, மலையாளம் என 20க்கும் மேற்பட்ட படங்களில் நாயகியாக நடித்த ஸ்வாதி கடந்த 2018 ஆம் ஆண்டு விகாஸ் வாசு என்பவரை திருமணம் செய்தார். 

திருமணம் ஆகி 5 ஆண்டுகள் ஆன நிலையில், திடீரென ஸ்வாதி சில நாள்களுக்கு முன் விகாஸ் உடன் எடுத்துக்கொண்ட திருமணப் புகைப்படங்களை இன்ஸ்டாகிராமிலிருந்து நீக்கினார். இதனால், அதிர்ச்சியடைந்த ரசிகர்கள் இருவரும் விவாகரத்து செய்ய உள்ளதாக கருத்துக்களைப் பகிர்ந்து வந்தனர். 

இதையும் படிக்க: பிரபல மேடைக் கலைஞரைக் காதலிக்கும் நடிகை காயத்ரி?

இந்நிலையில், இதுகுறித்து ஸ்வாதியிடம் கேட்டபோது அவர், ‘சொல்வதற்கு ஒன்றும் இல்லை. எனக்குத் தேவைப்பட்டால் அதைச் செய்வேன்’ என கூறியுள்ளார். மேலும், ஸ்வாதி தன் கணவரைப் பிரிந்து வாழ்வது உறுதிசெய்யப்பட்டுள்ளதால் விரைவில் விவாகரத்து பெறுவார்கள் எனத் தகவல் வெளியாகியுள்ளது.