குத்துச்சண்டை பயிலும் எதிர்நீச்சல் நடிகை! சீரியலில் சண்டைக்காட்சியா?

எதிர்நீச்சல் தொடரில் தொடரில் நடித்துவரும் நடிகை ஹரிபிரியா இசை குத்துச்சண்டை பயிலும் விடியோ வெளியாகியுள்ளது. 

எதிர்நீச்சல் தொடரில் நந்தினி பாத்திரத்தில் நடித்துவரும் ஹரிபிரியாவுக்கு அதே தொடரில் மகளாக நடித்துவரும் மோனிஷா குத்துச்சண்டை பயிற்சியை அளிக்கிறார். 

குழந்தை நட்சத்திரமான மோனிஷா, தற்காப்புக் கலையில் கைதேர்ந்தவர். கராத்தே, குத்துச்சண்சை, களரி, சிலம்பம், வாள் சண்டை, குதிரையேற்றம் உள்ளிட்டவற்றை சிறு வயதுமுதலே பயின்று வருகிறார். 

தனது சகோதரியுடன் சேர்ந்து தற்காப்புக் கலையில் கின்னஸ் உலக சாதனையும் படைத்துள்ளார். தற்காப்புக் கலையில் கின்னஸ் சாதனை படைத்த உலகின் முதல் சகோதரிகள் என்ற பெருமையையும் பெற்றுள்ளனர். 

படிக்க |  நிஜ வாழ்க்கையில் கணவரைக் கொண்டாடும் எதிர்நீச்சல் நடிகை!

தற்காப்புக் கலை மட்டுமின்றி இசையையும் முறையாகப் பயின்றுள்ளார் மோனிஷா. தற்போது எதிர்நீச்சல் தொடரில் ஆணாதிக்கம் நிறைந்த ஆதி குணசேகரனுக்கு மகளாக நடித்து வருகிறார். 

இதனிடையே எதிர்நீச்சலில் நடித்துவரும் ஹரிபிரியா இசைக்கு நடிகை மோனிஷா குத்துச்சண்டை பயிற்சி அளிக்கும் விடியோ தற்போது வெளியாகியுள்ளது. 

இதில் முறைப்படி குத்துச்சண்டை பயிற்சி எடுப்பதைப்போன்று விடியோ பதிவாகியுள்ளது. ஹரிபிரியா பகிர்ந்துள்ள இந்த விடியோக்கு ரசிகர்கள் பலர் கருத்துகளைத் தெரிவித்து வருகின்றனர். எதிர்நீச்சல் தொடரில் சண்டைக்காட்சிகள் வரவுள்ளதா? அதற்காக நந்தினி பயிற்சி எடுக்கிறாரா? என்று ரசிகர்கள் கேள்வி எழுப்பி வருகின்றனர்.