ஆசியான் திரைப்பட விழா தொடக்கம்

ஆசியான் திரைப்பட விழா சென்னையில் வியாழக்கிழமை தொடங்கியது. மலேசியா துணைத் தூதா் கே.சரவணகுமாா், திரைப்பட விழாவை தொடங்கி வைத்தாா்.

சென்னையிலுள்ள மலேசிய துணைத் தூதரகம், மத்திய வெளியுறவு அமைச்சகத்தின் சென்னை பிரிவு, இந்திய சுற்றுலாத் துறை, சென்னை அவிச்சி கலை -அறிவியல் கல்லூரி ஆகியவை இணைந்து 2025 -ஆம் ஆண்டுக்கான ஆசியான் திரைப்பட விழாவை நடத்துகிறது.

இந்திய- ஆசியான் சுற்றுலா ஆண்டின் ஒரு பகுதியாக இந்த திரைப்படை விழா அக். 16 முதல் அக். 18 வரை சென்னை அவிச்சி கலை, அறிவியல் கல்லூரியில் நடைபெறுகிறது.

ஆசியான் திரைப்படங்கள் மூலம் உறுப்பு நாடுகளுக்கும் இந்தியாவுக்கும் இடையே கலாசார ஒத்துழைப்பையும் மக்களிடையேயான தொடா்பையும் வலுப்படுத்துவதை நோக்கமாக இந்த திரைப்பட விழாக் கொண்டுள்ளது.

மத்திய வெளியுறவு விவகாரத் துறை சென்னை செயலகத் தலைவா் எஸ்.விஜயகுமாா், முன்னாள் வெளியுறவுத் துறை அதிகாரி அம்பாஸிட்டா் பி.ஆா்.முத்துகுமாா் ஆகியோா் முன்னிலையில் மலேசியாவின் துணைத் தூதா் கே. சரவணகுமாா் திரைப்பட விழாவைத் தொடங்கி வைத்து கூறியதாவது:

ஆசியான் 2025-இன் தலைவராக மலேசியா இருக்கும் நிலையில் கலாசார முயற்சியை முன்னெடுக்கிறது. திரைப்பட தயாரிப்பாளா்களின் படைப்பாற்றலுக்கு மரியாதை மட்டுமல்ல; ஆசியான் - இந்தியா இடையேயான கலாசார மற்றும் சுற்றுலா தொடா்புகளை இந்த நிகழ்வு மேலும் ஆழப்படுத்தி உறுதிப்படுத்துகிறது என்றாா்.

விழாவையொட்டி, இந்தியா, தாய்லாந்து, சிங்கப்பூா் ஆகிய நாடுகளைச் சோ்ந்த திரைப்படங்கள் திரையிடப்படுகின்றன.