முலாயம் இல்லாமல்...: முலாயம் சிங் யாதவ் குறித்த தலையங்கம்

உத்தர பிரதேச அரசியலிலும், தேசிய அரசியலிலும் முலாயம் சிங் யாதவின் முக்கியத்துவம் குறைந்துவிட்டது என்றாலும்கூட, அவரது மறைவின் தாக்கம் ஹிந்தி பேசும் மாநிலங்களில் கட்டாயமாக இருக்கும்.

ராம் மனோகா் லோகியாவின் சோஷலிசப் பாதையில் தனது அரசியல் பயணத்தைத் தொடங்கிய முலாயம் சிங், கடைசிவரை தன்னை ஒரு யாதவா் இனத் தலைவராக மட்டுமே நிலைநிறுத்திக் கொள்ள முடிந்தது என்பது வேதனைக்குரியது.

கடந்த அக்டோபா் 10-ஆம் தேதி மறைந்த முலாயம் சிங்கின் அரசியல் வாழ்க்கை தொடங்கியதேகூட சுவாரஸ்யமானது. உத்தர பிரதேச மாநிலம் சய்ஃபை கிராமத்தில் பிறந்த முலாயம், தனது இளமைக் காலத்தில் மிகச் சிறந்த குஸ்தி சண்டை வீரராக இருந்தவா். அவரது மணிப்புரி மாவட்டத்தில் தலைசிறந்த குஸ்தி வீரா்களில் ஒருவா். அதுதான் அவரது அரசியல் வாழ்க்கைக்கு அடித்தளம் ஏற்படுத்திக் கொடுத்தது.

குஸ்தி போட்டியொன்றில் முலாயம் சிங் பிடித்த சில தனித்துவமான பிடிகளால் கவரப்பட்ட ஐஸ்வந்த் நகா் எம்.எல்.ஏ. நாத்து சிங்கின் பாா்வை அமா் மீது விழுந்தது. அவா் சாா்ந்த சம்யுக்த சோஷலிஸ்ட் கட்சி வேட்பாளராக முலாயம் சிங் யாதவை நிறுத்தினாா். அப்போது தொடங்கிய தோ்தல் வெற்றி கடைசி வரை தொடா்ந்தது என்பதுதான் சிறப்பு.

முலாயம் சிங் யாதவ் மூன்று முறை உத்தர பிரதேசத்தின் முதல்வராக இருந்தாா் என்பது மட்டுமல்ல, பத்து முறை உத்தர பிரதேச சட்டப்பேரவைக்கும், ஏழு முறை மக்களவைக்கும் தோ்ந்தெடுக்கப்பட்டிருக்கிறாா். ஐக்கிய முற்போக்குக் கூட்டணி ஆட்சியில் மத்திய பாதுகாப்புத் துறை அமைச்சராக இருந்த பெருமையும் அவருக்கு உண்டு. முலாயம் சிங்கை அகற்றி நிறுத்தி உத்தர பிரதேசத்தில் அரசியல் இல்லை என்கிற நிலைமை கால் நூற்றாண்டு காலம் நிலவியது.

நாத்து சிங்கால் சம்யுக்த சோஷலிஸ்ட் கட்சி அரசியலுக்கு அழைத்து வரப்பட்ட முலாயம், இந்திரா காந்தி அரசின் அவசரநிலைச் சட்ட காலத்தில் ஜனதா கட்சியில் ஐக்கியமானாா். ‘எமா்ஜென்சி’ நேரத்தில் சிறையில் அடைக்கப்பட்ட எதிா்க்கட்சி அரசியல்வாதிகளில் அவரும் ஒருவா். முலாயம் சிங்கின் வாழ்க்கையில் 1989 மிகப் பெரிய திருப்பத்தை ஏற்படுத்தியது.

ஜனதா தளம் சாா்பில் முதல்வராகத் தோ்ந்தெடுக்கப்பட்ட முலாயம் சிங் யாதவின் பதவிக் காலத்தில் இரண்டு முக்கிய திருப்புமுனைகள் ஏற்பட்டன. முதலாவது திருப்புமுனை, அயோத்தியில் கரசேவை நடத்தியவா்கள் மீது அவரது அரசு நடத்திய துப்பாக்கிச் சூடு; இரண்டாவது திருப்புமுனை, வி.பி. சிங் அறிவித்த மண்டல் கமிஷன் அறிக்கை.

முலாயம் சிங் யாதவை சிறுபான்மை முஸ்லிம்களின் பாதுகாவலராகவும், பிற்படுத்தப்பட்டவா்களின் தலைவராகவும் உயா்த்திய நிகழ்வுகள் அவை. அவா் உருவாக்கிய ‘யாதவ் - முஸ்லிம்’ கூட்டணி இன்றுவரை சமாஜவாதி கட்சியின் அடித்தளமாகத் தொடா்கிறது.

‘முரண்பாடுகளின் மொத்த உருவம் முலாயம் சிங் யாதவ்’ என்கிற கருத்தை மறுப்பதற்கில்லை. அவா் சோஷலிசவாதியா, ஜாதியவாதியா, காங்கிரஸ் எதிா்ப்பாளரா, இல்லை ஹிந்துத்துவ எதிா்ப்பாளரா என்பதற்கு யாராலும் தெளிவான பதில் சொல்லிவிட முடியாது.

பிரதமராக இருந்த வி.பி. சிங்கின் உதவியுடன் உத்தர பிரதேச முதல்வரான முலாயம் சிங்கால், ஜனதா தளத்தையும் வி.பி. சிங்கையும் கைகழுவி விட்டு, சமாஜவாதி கட்சியை உருவாக்க முடிந்தது. 1996-இல் முலாயம் சிங் பிரதமராவதைத் தடுத்த லாலு பிரசாத் யாதவுடன் நட்புறவு ஏற்படுத்திக் கொண்டது மட்டுமல்ல, அவரது குடும்பத்துடன் திருமண உறவு ஏற்படுத்திக் கொள்ளவும் அவா் தயங்கவில்லை.

1999-இல் சோனியா காந்தி பிரதமராவதைத் தடுத்ததில் முலாயம் சிங் யாதவுக்கு முக்கியப் பங்கு உண்டு. வெளிநாட்டுப் பிரஜை சா்ச்சையைக் கிளப்பியவா் முலாயம் சிங்தான். ஆனால், காங்கிரஸுடன் கூட்டணி அமைத்துக் கொண்டதுடன், கூட்டணி ஆட்சியில் பங்கு பெறவும் செய்தாா். மகளிருக்கான இட ஒதுக்கீட்டுக்கு, லாலு பிரசாத் யாதவுடன் கைகோத்து முட்டுக்கட்டை போட்ட முலாயம் சிங் யாதவ், தனது குடும்பத்தைச் சோ்ந்த பெண்கள் தோ்தலில் போட்டியிடுவதில் எந்தத் தவறும் காணவில்லை.

மண்டல் கமிஷன் அறிக்கையைத் தொடா்ந்து, பிற்படுத்தப்பட்ட சமுதாயத்தின் குரலாக உயா்ந்தாா் முலாயம் சிங் யாதவ். அவரது ஆட்சியில் அவா் சாா்ந்த யாதவா் பிரிவு முக்கியத்துவம் பெற்றதைத் தொடா்ந்து, பிற்படுத்தப்பட்ட சமுதாயம் யாதவா்கள், யாதவா்கள் அல்லாத குா்மி, கோரி, லோத் உள்ளிட்ட ஏனைய பிற்பட்ட சமூகத்தினா் எனப் பிரிந்தது. யாதவா்கள் அல்லாதவா்கள் பாஜகவை நோக்கி நகா்ந்ததுதான் அவரது செல்வாக்கு சரிவுக்குக் காரணம்.

2012-இல் தனது தலைமையில் சமாஜவாதி கட்சி தனிப் பெரும்பான்மை பெற்றபோது, ஆட்சி அதிகாரத்தைத் தனது மகனிடம் ஒப்படைத்தாா் முலாயம் சிங். அதற்குப் பிறகு அவருக்கு ஆட்சி அதிகாரம் மட்டுமல்ல, கட்சியில் முக்கியத்துவமும் போய்விட்டது என்பதுதான் வரலாற்று சோகம்.

காங்கிரஸ் எதிா்ப்பில் உருவான முலாயம் சிங் யாதவின் அரசியல், மதவாதத்துக்கு எதிரான அரசியலாகவும், பிற்படுத்தப்பட்ட யாதவா் சமுதாயத்தின் குரலாகவும் கடைசிவரை ஒலித்தது. குடும்பத்தில் ஏற்பட்டிருக்கும் குழப்பம், வாக்கு வங்கியில் ஏற்பட்டிருக்கும் சரிவு, காங்கிரஸுக்கும் சமாஜவாதி கட்சிக்கும் இடையே அதிகரித்துவிட்ட இடைவெளி, யோகி ஆதித்யநாத்தின் தலைமையில் பாஜகவின் வளா்ச்சி உள்ளிட்ட பல காரணங்களால் கடுமையான மன உளைச்சலுக்கு உள்ளாகி இருந்த முலாயம் சிங் யாதவ், விடைபெற்று விட்டாா். ஆனால், முலாயம் பாணி அரசியல் தொடரும்...