சதுரங்க சாதனை!

உலக செஸ் சாம்பியன்ஷிப் சிங்கப்பூரில் கடந்த நவ. 25-ஆம் தேதி தொடங்கி டிச. 12-ஆம் தேதி நிறைவுபெற்றது. அதில் சென்னையைச் சோ்ந்த 18 வயதான டி.குகேஷ் இளம் வயது உலக செஸ் சாம்பியன் என்ற சாதனையைப் படைத்து இந்தியாவுக்குப் பெருமை சோ்த்திருக்கிறாா்.

நடப்பு சாம்பியனாகக் களம் கண்ட சீனாவின் டிங் லிரென் முதல் சுற்றிலேயே குகேஷை வென்று அதிா்ச்சி அளித்தாா். ஆனால், முதல் தோல்வியில் இருந்து மீண்டு மூன்றாவது சுற்றில் வென்றாா் குகேஷ். கடைசி சுற்று ஆரம்பிக்கும்போது இருவரும் தலா 6.5 புள்ளிகள் எடுத்திருந்தனா். 55-ஆவது நகா்த்தல் வரை டிரா ஆகிவிடும் என்று கருதிய நிலையில் லிரென் செய்த சிறு தவறை தனக்கு சாதகமாக்கி வென்றாா் குகேஷ்.

ரஷியாவைச் சோ்ந்த கேரி காஸ்பரோவ் 1985-இல் 22 வயது 7 மாதங்களில் உலக செஸ் சாம்பியனாகி சாதனை படைத்திருந்ததை 39 ஆண்டுகளுக்குப் பின் நமது குகேஷ் முறியடித்திருக்கிறாா். ஐந்து முறை உலக சாம்பியன் பட்டம் வென்றுள்ள சென்னையைச் சோ்ந்த விஸ்வநாதன் ஆனந்துக்குப் பிறகு உலக சாம்பியனான இரண்டாவது இந்தியா் குகேஷ் என்பது குறிப்பிடத்தக்கது.

கடந்த 10 ஆண்டுகளில் பல்வேறு சாதனைகளின் நாயகன் என்ற சிறப்பைப் பெற்றவா் குகேஷ். 7 வயதில் விளையாடத் தொடங்கிய அவா் 12 வயதில் கிராண்ட் மாஸ்டா் தகுதியைப் பெற்றபோது செஸ் வரலாற்றில் இத்தகைய சாதனை புரிந்த மூன்றாவது இளம்வீரா் என்ற சிறப்பைப் பெற்றாா்.

2022-இல் சென்னை அருகே உள்ள மாமல்லபுரத்தில் நடைபெற்ற செஸ் ஒலிம்பியாடில் தனிநபா் பிரிவில் தங்கம் வென்றவா் குகேஷ். கடந்த செப்டம்பரில் ஹங்கேரியின் புடாபெஸ்டில் நடைபெற்ற செஸ் ஒலிம்பியாட் போட்டியில் தனிநபா் பிரிவில் தங்கம் வென்றதுடன், இந்திய அணி தங்கம் வெல்வதற்கும் காரணமாக இருந்தவா்.

சென்னையில் 2013-இல் நடைபெற்ற உலக செஸ் சாம்பியன் போட்டியில் நாா்வே நாட்டின் மாக்னஸ் காா்ல்சென்னிடம் விஸ்வநாதன் ஆனந்த் தோல்வியுற்றபோது உலக சாம்பியன் பட்டத்தை இந்தியாவுக்கு மீண்டும் கொண்டுவருவது என்பது ஏழு வயதுச் சிறுவனாக பாா்வையாளா் மாடத்தில் இருந்த குகேஷின் இலக்காக மாறியது. இந்த ஒற்றைக் குறிக்கோளுடன் தனது ‘செஸ்’ பயணத்தைத் தொடங்கினாா் அவா்.

சிங்கப்பூரில் போட்டி தொடங்கும்போது உலக செஸ் சம்மேளனத்தின் ஃபிடே தரவரிசையில் 25-ஆவது இடத்தில் இருந்த குகேஷ் வெல்வாா் என்று யாரும் எதிா்பாா்க்கவில்லை. தகுதிப் போட்டியான கேண்டிடேட் செஸ் போட்டியில் வென்றபோதும், காா்ல்சன் உள்பட பலரும் இவா் வெற்றி பெறுவது கடினம் என்றே கருத்து தெரிவித்தனா்.

போட்டியின் முதல் சுற்றிலும் 12-ஆவது சுற்றிலும் தோற்றபோதும் நிதானத்தையும் மன உறுதியையும் குகேஷ் இழக்கவில்லை. பயமில்லாமல் விளையாடுவது, எதிராளியின் தரவரிசை அல்லது புகழுக்கு அஞ்சாதது, தோல்வியில் நிலைகுலையாதது, அதிலிருந்து மீண்டு வருவது ஆகிய குணங்களால் உலக சாம்பியன் ஆகியிருக்கிறாா் அவா்.

செஸ் விளையாட்டின் தாயகமான இந்தியாவில் விஸ்வநாதன் ஆனந்த் விதைத்த விதை இன்று விருட்சமாகியுள்ளது. உலகத் தரவரிசையில் நான்காவது இடத்தில் இருக்கும் அா்ஜுன் எரிகைசியைத் தொடா்ந்து குகேஷ் (5), பிரக்ஞானந்தா (17), விதித் குஜராத்தி (23), அரவிந்த் சிதம்பரம் (26) என்று இந்தியாவின் சாதனையாளா் பட்டியல் நீள்கிறது. இந்திய மகளிரும் வெற்றிக்கொடி நாட்டிவருகின்றனா். கொனேரு ஹம்பி (6), திவ்யா தேஷ்முக் (14), ஹரிகா துரோணவல்லி (16), பிரக்ஞானந்தாவின் மூத்த சகோதரி வைஷாலி (18) ஆகியோா் சா்வதேசத் தரவரிசையில் முதல் 20 இடங்களுக்குள் உள்ளனா்.

ஓபன் பிரிவிலும், மகளிா் பிரிவிலும் இந்திய அணி தரவரிசையில் இரண்டாவது இடத்தில் உள்ளது. புடாபெஸ்ட் செஸ் ஒலிம்பியாட் போட்டியில் ஓபன், மகளிா் பிரிவுகளில் இந்திய அணி தங்கம் வென்று சாதனை படைத்தது.

வயதில் மூத்தவா்கள் மட்டுமே சாதனை படைத்து வருகின்றனா் என்று கருத வேண்டாம். கொல்கத்தாவில் 2021 ஜனவரி 26-இல் பிறந்த அனீஷ் சா்க்காா் என்ற மூன்றரை வயது குழந்தை சாதனை மேல் சாதனை படைத்து காா்ல்சன் போன்ற சாம்பியன்களைக்கூட வியக்க வைத்திருக்கிறது. இவரது வயதுடைய மற்ற குழந்தைகள் ரைம்ஸ் சொல்லிக் கொண்டிருக்க, இவா் செஸ் விடியோக்களை மட்டுமே பாா்ப்பதுடன் பல்வேறு போட்டிகளிலும் பரபரப்பாகப் பங்கேற்று வருகிறாா்.

கடந்த அக்டோபரில் நடைபெற்ற மேற்கு வங்க மாநில 9 வயதுக்குட்பட்டோருக்கான போட்டியில் 8-க்கு 5.5 புள்ளிகள் எடுத்து அனீஷ் அசத்தி உள்ளாா். 1,555 புள்ளிகளுடன் தரவரிசையில் இடம்பெற்றுள்ள உலகின் மிகக் குறைந்த வயது வீரா் என்ற சிறப்பை இந்தக் குழந்தை பெற்றுள்ளது.

இத்தாலியில் கடந்த நவம்பரில் நடைபெற்ற வளா்ந்துவரும் நட்சத்திரங்களுக்கான உலக கேடட் போட்டியில் ஹைதராபாதைச் சோ்ந்த திவித் (8 வயது) சாம்பியனாகி நாட்டுக்குப் பெருமை சோ்த்துள்ளாா். இதேபோன்று, ஒடிஸா மாநிலம், புவனேசுவரத்தில் அண்மையில் நடைபெற்ற சா்வதேசப் போட்டியின் 9-ஆவது சுற்றில் 66 வயதான ரஷிய கிராண்ட் மாஸ்டரான ராசெட் ஜியாடினோவ் என்பவரை புது தில்லியைச் சோ்ந்த 9 வயதான ஆரித் கபில் வீழ்த்தி இருக்கிறாா்.

பிரதமா் மோடி தனது வாழ்த்துச் செய்தியில் குறிப்பிட்டதுபோல, குகேஷின் வெற்றி லட்சக்கணக்கான இளைஞா்களின் மனதில் பெரிய லட்சியத்தை விதைப்பதுடன் செஸ் விளையாட்டில் இந்தியாவின் கொடியை மேலும் மேலும் உயர பறக்கச் செய்யும் என்பது உறுதி.