ஆண்டுதோறும் குடியரசு தினத்தையொட்டி அறிவிக்கப்படும் பத்ம விருதுகள் சம்பிரதாயமானவை என்ற கருத்தை பாஜக தலைமையிலான மத்திய அரசு மாற்றியமைத்துள்ளது. அந்த வகையில், கடந்த ஆண்டைப் போலவே நிகழாண்டும் பத்ம விருதுகள் அறிவிப்பில் பல்வேறு சாமானிய சாதனையாளா்கள் அடையாளம் காணப்பட்டு கெளரவிக்கப்பட்டிருப்பது மகிழ்ச்சியைத் தருகிறது.
பத்ம விருதுகளுக்காகப் பெறப்படும் விண்ணப்பங்கள் பிரதமா் ஆண்டுதோறும் அமைக்கும் குழுவின் பரிசீலனைக்காக அனுப்பப்படும். மத்திய அமைச்சரவை செயலா் தலைமையிலான இக்குழுவில் உள்துறைச் செயலா், குடியரசுத் தலைவரின் செயலா், மேலும் பல்துறை நிபுணா்கள் ஆறு போ் உறுப்பினா்களாக இருப்பா். இக்குழு தனது பரிந்துரைகளை பிரதமா், குடியரசுத் தலைவா் ஆகியோரின் ஒப்புதலுக்காக அனுப்பிவைக்கும்.
ஆரம்பத்தில் இந்த விருதுகள் பல்வேறு துறை சாா்ந்த பிரபலங்களுக்கே பெரும்பாலும் வழங்கப்பட்டு வந்தன. 2014-ஆம் ஆண்டு பிரதமா் நரேந்திர மோடி தலைமையிலான பாஜக ஆட்சி அமைந்த பிறகு சாமானியா்களுக்கும் முக்கியத்துவம் அளிக்கும் வகையில் வழங்கப்பட்டு வருகிறது. அதுமட்டுமல்ல, கொள்கை ரீதியாக பாஜகவுடன் முரண்பட்டிருப்பவா்களுக்கும் விருதுகள் வழங்கப்படுகின்றன.
நிகழாண்டு பத்ம விபூஷண் விருது ஐவருக்கும், பத்ம பூஷண் விருது 17 பேருக்கும், பத்மஸ்ரீ விருது 110 பேருக்கும் என மொத்தம் 132 பேருக்கு பத்ம விருதுகள் அறிவிக்கப்பட்டிருக்கின்றன. இவா்களில் 34 போ் எந்தவொரு புகழ் வெளிச்சமும் இன்றி சமூகத்தில் பெரும் மாற்றங்களை ஏற்படுத்தும் பணியில் ஈடுபட்டு வருபவா்கள் என்பது குறிப்பிடத்தக்கது.
அஸ்ஸாம் மாநிலத்தைச் சோ்ந்த 70 வயதான பாா்பதி பரூவா எனும் பெண்மணி, கெளரிபூா் ராஜாக்கள் வம்சத்தைச் சோ்ந்தவா். செல்வாக்கான குடும்பப் பின்னணியைக் கொண்டிருந்தாலும் யானைகளின் பராமரிப்புக்காகத் தனது வாழ்க்கையை அா்ப்பணித்தவா். ‘யானைகளின் ராணி’ எனப்படும் இவா்தான் யானை பராமரிப்புப் பணியில் ஈடுபட்டுள்ள முதல் பெண் ஆவாா். யானைகள் - மனிதா்களின் மோதலுக்கு தீா்வு கண்டவா். இவரது அறிவியல்பூா்வமான உத்திகள், தொல்லை தரும் காட்டு யானைகளைப் பிடிப்பதற்கு அரசுக்கு உதவுகின்றன.
வேலூரை சொந்த ஊராகக் கொண்ட டாக்டா் பிரேமா தன்ராஜ். 72 வயதாகும் இவா் சிறுவயதில் தீவிபத்தில் 50 சதவீத தீக்காயம் அடைந்தவா். அதன்பிறகு நன்றாகப் படித்து நாட்டின் சிறந்த பிளாஸ்டிக் அறுவை சிகிச்சை நிபுணா்களில் ஒருவராக உயா்ந்தவா். தற்போது பெங்களூரில் வசித்துவரும் இவா், தீவிபத்தில் காயமடைந்தவா்களின் மறுவாழ்வுக்காக தன்னை அா்ப்பணித்துக் கொண்டவா்.
பிகாரைச் சோ்ந்தவா் சாந்தி தேவி. ஒரு காலத்தில் தனது ஊரில் பொது இடத்திலிருந்து குடிநீா் அருந்தவே அனுமதி மறுக்கப்பட்ட இவா், தனது ஓவியக் கலைத் திறமையால் முன்னேறியவா். தில்லியில் ஜி20 உச்சி மாநாட்டின்போது பாரத் மண்டபத்தில் நடைபெற்ற கலை, கைவினைப் பொருள்கள் அரங்கத்தில் மதுபாணி வகை ஓவியத்தால் சந்திரயான்-3 கருப்பொருளைச் சித்திரித்து அனைவரின் கவனத்தையும் ஈா்த்தவா்.
கா்நாடகத்தின் மைசூரைச் சோ்ந்தவா் சோமண்ணா. தேன் சேகரிப்புத் தொழிலில் ஈடுபட்டுள்ள ஜெனு குருபா பழங்குடியின மக்களின் வாழ்க்கையை மேம்படுத்துவதற்காக கடந்த 40 ஆண்டு காலமாகப் பணியாற்றி வருபவா். சத்தீஸ்கரைச் சோ்ந்தவா் ஜெகேஸ்வா் யாதவ். பிா்கோா், கோா்வா ஆகிய பகுதிகளைச் சோ்ந்த பழங்குடியின மக்களிடையே எழுத்தறிவின்மையைப் போக்க தீவிரமாகப் பணியாற்றி வருபவா்.
தமிழகத்தின் கோவை மாவட்டம், மேட்டுப்பாளையம் அருகேயுள்ள தாசம்பாளையத்தைச் சோ்ந்தவா் பத்ரப்பன். 87 வயதாகும் இவா் ‘வள்ளி கும்மி’ எனப்படும் கலையின் ஆசிரியா். ஆண்கள் மட்டுமே பங்கேற்று வந்த வள்ளி கும்மி ஆட்டத்தில், பெண்களுக்கும் பயிற்சியளித்தவா் பத்ரப்பன். பாரம்பரிய கலைகளுக்கு எல்லாம் முன்னோடியாக வள்ளி கும்மி கலை கருதப்படுகிறது. இந்தக் கலை மூலம் உடலில் நரம்புகள் வலுப்பெற்று உடல் ஆரோக்கியத்துடன் வாழ முடியும் என்பது பத்ரப்பனின் கருத்து.
ஹரியாணாவைச் சோ்ந்தவா் குா்வீந்தா் சிங். ஒரு விபத்தில் உடலின் ஒரு பகுதி செயலிழந்து மூன்று சக்கர சைக்கிளில் முடங்கினாலும், தனது குழந்தைகள் பராமரிப்பு நிறுவனம் மூலம் குழந்தைகளின் கனவுகளை நனவாக்கியவா். விபத்துகளில் சிக்கியவா்கள், கா்ப்பிணிகள் என 6,000-க்கும் மேற்பட்டோருக்கு இலவச அவசர ஊா்தி சேவையை வழங்கி உதவியவா். சத்தீஸ்கரைச் சோ்ந்த பாரம்பரிய மருத்துவா் ஹேம்சந்த் மாஞ்சி. 50 ஆண்டுகளாக மாநிலம் முழுவதும், குறிப்பாக கிராமப்புறங்களில் மருத்துவ சேவையாற்றி வருகிறாா்.
கேரளத்தின் காசா்கோடு மாவட்டத்தைச் சோ்ந்தவா் சத்யநாராயணன் பெலேரி. நெல் விவசாயியான இவா் 650 பாரம்பரிய நெல் ரகங்களைத் தனது பண்ணையில் பாதுகாத்து வருகிறாா். இவரைப் போல அஸ்ஸாமை சோ்ந்த விவசாயி சா்வேஸ்வா், அந்தமானைச் சோ்ந்த இயற்கை விவசாயி செல்லம்மாள், அருணாசல பிரதேசத்தைச் சோ்ந்த யனூன் ஜமோ லெகோ, கோவாவை சோ்ந்த சஞ்சய் ஆனந்த் பாட்டீல் போன்ற இயற்கையைக் காக்கும் பணியில் ஈடுபட்டுள்ள விவசாயிகளுக்கும் பத்மஸ்ரீ விருது அறிவிக்கப்பட்டுள்ளது.
சமூகத்துக்கு சேவையாற்றுபவா்களை கெளரவிப்பதும், அவா்களை ஊக்கப்படுத்துவதும்தான் விருது அறிவிப்பின் பிரதான நோக்கம். அதேவேளையில், சமூகத்தில் தங்களது அா்ப்பணிப்பான சேவைகள் மூலம் அமைதிப் புரட்சியை ஏற்படுத்தி வரும் இத்தகைய சாமானியா்களை அடையாளம் கண்டறிந்து அவா்களுக்கு வெளிச்சம் தருவதன் மூலம் சமூகத்தின் அனைத்துத் தரப்பு மக்களுக்கும் ஓா் உத்வேகம் ஏற்படுகிறது. தொடரட்டும் மத்திய அரசின் பணி.
பொதுநோக்கான் வேந்தன் வரிசையா நோக்கின்
அதுநோக்கி வாழ்வாா் பலா்.
அரசன் எல்லோரையும் பொதுவகையாக நோக்காமல், அவரவா் சிறப்புக்கு ஏற்றவாறு நோக்கினால், அதை விரும்பிச் சுற்றமாக வாழ்கின்றவா் பலா் ஆவா்.