பெண் எழுத்தாளருக்கு அனுமதி மறுப்பால் சர்ச்சை: கலாம் நூல் வெளியீட்டு விழா ரத்து

கேரளத்தில் ஆன்மிகத் தலைவர் பங்கேற்கவிருந்த அப்துல் கலாம் நூல் வெளியீட்டு விழாவுக்கு பெண் எழுத்தாளருக்கு அனுமதி மறுக்கப்பட்டதாக சர்ச்சை எழுந்துள்ளது.

பெண் எழுத்தாளருக்கு ஆதரவாக பல்வேறு அமைப்பினர் போராட்டத்தில் ஈடுபட்டதால், நூல் வெளியீட்டு விழா ரத்து செய்யப்பட்டது.

குடியரசு முன்னாள் தலைவர் அப்துல் கலாம் எழுதிய "சுவாமி பிரமுக் உடனான ஆன்மிக அனுபவங்கள்' என்ற நூலை, மலையாளத்தில் "காலாதீதம்' (காலத்துக்கு அப்பால்) என்ற பெயரில், பெண் எழுத்தாளர் ஸ்ரீதேவி எஸ்.கர்த்தா மொழிபெயர்ப்பு செய்துள்ளார்.

திருச்சூரில் சனிக்கிழமை நடைபெறவிருந்த இந்த நூல் வெளியீட்டு விழாவில், "பிஏபிஎஸ் சுவாமி நாராயணா சன்ஸ்தா' என்ற ஹிந்து ஆன்மிக அமைப்பின் தலைவர் பிரம்ம விஹாரிதாஸ் பங்கேற்க திட்டமிடப்பட்டிருந்தது. இதனிடையே, "விழா மேடையில் பெண்கள் இருப்பதை சுவாமிஜி விரும்பவில்லை; தாங்கள் அவர் பார்வையில் இருந்து விலகியிருக்க வேண்டும்' என எழுத்தாளர் ஸ்ரீதேவிக்கு நிகழ்ச்சி ஏற்பாட்டாளர் தெரிவித்ததாகக் கூறப்படுகிறது.

இதுகுறித்து ஸ்ரீதேவி தனது முகநூல் பக்கத்தில் கூறியிருப்பதாவது:

ஆன்மிக அமைப்பின் விதிகளின்படி, சுவாமிஜியுடன் ஒரே மேடையில் பெண்கள் பங்கேற்கக் கூடாதாம். அப்படியானால், பெண்களின் தூய்மையற்ற நிழல் கூட அவர் மீது விழாமல் இருப்பதற்கு, மேடை முன்பாக, முதல் மூன்று வரிசைகளை அவரது ஆதரவாளர்களுக்கு முன்பதிவு செய்யப்பட வேண்டும்.

பெண்களுக்கு எதிரான கொள்கைகளைக் கொண்டுள்ள தலிபான்களுக்கும், இவர்களுக்கும் என்ன வித்தியாசம்? என்று அவர் விமர்சித்திருந்தார்.

இதைத் தொடர்ந்து, எழுத்தாளர் ஸ்ரீதேவிக்கு ஆதரவாக, நூல் வெளியீட்டு விழா நடைபெறவிருந்த கேரள சாகித்ய அகாதெமி முன்பாக, பல்வேறு அமைப்பினர் போராட்டத்தில் ஈடுபட்டனர். இதுகுறித்து, பெண் கவிஞர் சுகதாகுமாரி கூறுகையில், "கடவுளை பெண் வடிவில் காணும் ஒரே மதம், ஹிந்து மதமாகும்; சுவாமி விவேகானந்தர், ஸ்ரீநாராயண குரு, ரமண மகரிஷி போன்ற துறவிகளும், சமூக சீர்திருத்தவாதிகளும் கூட பெண்கள் மீது பாகுபாடு காட்டவில்லை' என்றார்.

இதனிடையே, அந்தப் புத்தகத்தின் பதிப்பாளர் ஜானி கூறுகையில், "வழக்கமாக நூல் வெளியீட்டு விழாக்களில் மொழிபெயர்ப்பாளர்களை அழைப்பதில்லை; இந்த நூலை, அப்துல் கலாமுடன் இணைந்து எழுதிய அருண் திவாரி, பிரபல எழுத்தாளர் எம்.டி.வாசுதேவன் நாயர் ஆகியோர் வெளியிடத் திட்டமிடப்பட்டிருந்தது' என்றார்.