ஆதார் இணைப்பால் மட்டும் வங்கி முறைகேடுகளை தடுத்துவிட முடியுமா?: மத்திய அரசுக்கு உச்ச நீதிமன்றம் கேள்வி

வங்கிக் கணக்குடன் ஆதாரை இணைப்பதால் மட்டும் வங்கிக் கடன் முறைகேடுகளை தடுத்துவிட முடியுமா? என்று மத்திய அரசுக்கு உச்ச நீதிமன்றம் கேள்வி எழுப்பியுள்ளது.
ஆதார் அட்டை வழங்கும் திட்டம் அரசமைப்புச் சட்டத்துக்கு உள்பட்டதுதானா? என்பது தொடர்பாக உச்ச நீதிமன்ற தலைமை நீதிபதி தீபக் மிஸ்ரா தலைமையிலான 5 நீதிபதிகள் அரசியல்சாசன அமர்வு விசாரித்து வருகிறது. இந்த வழக்கில் மத்திய அரசு சார்பில் நீதிமன்றத்தில் வியாழக்கிழமை ஆஜரான அட்டர்னி ஜெனரல் கே.கே. வேணுகோபால் நீதிமன்றத்தில் கூறியதாவது:
கைவிரல் ரேகை, கண் கரு விழிப்படலம் போன்றவற்றை உறுதிப்படுத்தி அளிக்கப்படும் அடையாள ஆவணமான ஆதார் மூலம் வங்கி முறைகேடு, கருப்புப் பண முறைகேடு, வருமான வரி ஏய்ப்பு, பயங்கரவாதச் செயல்களுக்கு நிதி செல்வது தடுக்கப்படும். செல்லிடப்பேசி எண்ணுடன்ஆதார் எண்ணை இணைப்பதால் பயங்கரவாதிகள் செல்லிடப்பேசியை பயன்படுத்தி சதி செய்வது முறியடிக்கப்படும் என்றார்.
இதையடுத்து நீதிபதிகள் கூறியதாவது: பயங்கரவாதச் செயல்களில் ஈடுபட திட்டமிடுபவர்கள் முறைப்படி ஆதாரை இணைத்துதான் சிம் கார்டுகளை வாங்குவாôர்களா? எதோ ஒரு சில பயங்கரவாதிகளைப் பிடிக்க உதவும் என்று, 120 கோடி மக்களையும் செல்லிடப்பேசி எண்ணுடன் இணைக்கக் கூறுவது சரியானதுதானா?
இப்போது நிகழ்ந்துள்ள வங்கி முறைகேடுகளில் எதுவும் அடையாளம் தெரியாத நபர்களால் நடத்தப்பட்டது அல்ல. வங்கி முறைகேட்டில் ஈடுபட்டது யார் என்பது அனைவருக்குமே தெரிகிறது. இதனால், ஆதாரை இணைப்பதால் மட்டும் வங்கி முறைகேடுகளைத் தடுத்து விட முடியும் என்று எப்படிக் கூற முடியும்?
முறைகேடு செய்பவர்களுடன் வங்கி அதிகாரிகள் மறைமுகமாக கைகோத்து செயல்பட்டதுதான் பெரும்பாலான வங்கிக் கடன் முறைகேடுகளுக்கு காரணமாக அமைந்துள்ளது என்பதை மறுக்க முடியுமா?. யாருக்கு கடன் கொடுக்கிறோம் என்பது தெரியாமல் எந்த வங்கியும் கடன் கொடுக்கவில்லை. எனவே, ஆதார் இணைப்பு மட்டுமே வங்கிகளில் நடைபெறும் முறைகேடுகளைத் தடுக்கும் என்று கூறிவிட முடியாது.
வன்முறை நிகழும் பகுதிகளில் அவற்றைக் கட்டுப்படுத்த இணையதள சேவை, செல்லிடப்பேசி சேவையை அரசு தற்காலிகமாக முடக்கி வருகிறது. இது தொடர்பாக மக்கள் யாரும் கேள்வி எழுப்பவில்லை. ஆனால், ஆதாரை செல்லிடப்பேசி எண்ணுடன் இணைக்க வேண்டும் என்று கூறும்போதுதான் கேள்வி எழுகிறது.
ஆதார் ஏழைகளின் மேம்பாட்டுக்கு உதவும் என்றும் ஒரு வாதத்தை அரசுத் தரப்பு முன்வைத்துள்ளது. ஆனால், நாடு சுதந்திரமடைந்தது முதல் இப்போது வரை ஏழைகள் - பணக்காரர்கள் இடைவெளி அதிகரித்துதான் செல்கிறது. நாட்டில் உள்ள செல்வத்தில் 67 சதவீதம், ஒரு சதவீதம் பேரிடம் மட்டும்தான் குவிந்துள்ளது. வறுமைக்கோட்டுக்கு கீழே வசிப்பவர்களின் சதவீதம் குறைகிறதே தவிர, அவர்களின் எண்ணிக்கை அதிகரித்துதான் வருகிறது. ஆதார் வேண்டாம் என்று யாரும் கூறவில்லை. ஆனால், அனைத்து விஷயத்துக்கும் ஆதார் கண்டிப்பாக வேண்டும் என்று கூறப்படும்போதுதான் எதிர்ப்பு எழுகிறது என்று நீதிபதிகள் தெரிவித்தனர்.