தலித்துகளை அவமதிப்பது காங்கிரஸின் மரபு

தலித்துகளை அவமதிப்பது காங்கிரஸ் கட்சியின் மரபு என்று பாஜக தேசியத் தலைவர் அமித் ஷா தெரிவித்துள்ளார். பிரதமர் நரேந்திர மோடியை தலித் விரோத மனப்பான்மை கொண்டவர் என்று ராகுல் காந்தி விமர்சித்திருந்ததற்கு பதிலடி கொடுக்கும் வகையில் இவ்வாறு அமித் ஷா கூறியுள்ளார்.
இதுகுறித்து சுட்டுரையில் அமித் ஷா வியாழக்கிழமை வெளியிட்டுள்ள பதிவுகளில் தெரிவிக்கப்பட்டிருப்பதாவது:
எஸ்.சி., எஸ்.டி. வன்கொடுமை தடுப்பு சட்டத்தில் வலுவான திருத்தங்களை செய்ய வேண்டும், ஒபிசி ஆணையத்தை அமைக்க வேண்டும் என்பது உள்ளிட்டவையே பிரதமர் நரேந்திர மோடியின் மரபு. ஆனால் தலித்துகள் தலைவர்களை அவமதிப்பது, மண்டல் ஆணைய அறிக்கையை எதிர்ப்பது, ஒபிசி ஆணையத்தை வலுப்படுத்தும் நடவடிக்கைக்கு முட்டுக்கட்டை போடுவது ஆகியவையே காங்கிரஸின் மரபு ஆகும்.
கண்களை சிமிட்டுவது, நாடாளுமன்றத்தில் இடையூறு செய்வது ஆகிய பணிகள் உங்களுக்கு இல்லாமல் இருந்தால், உண்மைகளில் குறிப்பிட்ட நேரத்தை செலவிடும்படி கேட்டுக் கொள்கிறேன்.
உச்ச நீதிமன்ற தீர்ப்பினால், எஸ்.சி., எஸ்.டி. வன்கொடுமை தடை சட்டம் நீர்த்து போய்விட்டதாக தெரிவிக்கப்பட்ட நிலையில், அந்த சட்டத்தை வலுப்படுத்தும் வகையில், நாடாளுமன்றத்தில் பாஜக மசோதா கொண்டு வந்து நிறைவேற்றியுள்ளது. அப்படியிருக்கையில், தில்லியில் எஸ்.சி., எஸ்.டி. சட்டம் தொடர்பான விவகாரத்துக்காக ஏன் போராட்டம் நடத்தப்படுகிறது?
பாஜக ஆளும் மாநிலங்களில் தலித்துகள் தாக்கப்படுவதாகவும், ஒடுக்கப்படுவதாகவும் ராகுல் காந்தி குற்றஞ்சாட்டியுள்ளார். இதற்குப் பதிலாக, பீம் ராவ் அம்பேத்கர், பாபு ஜெகஜீவன் ராம், சிதாராம் கேசரி ஆகியோரை காங்கிரஸ் கட்சி எப்படி நடத்தியது என்பது குறித்து ராகுல் காந்தி பேசினால் நன்றாக இருக்கும். தலித்துகளை மேலாதிக்க மனோபாவத்துடனேயே காங்கிரஸ் நடத்தியது. பல ஆண்டுகளாக தலித்துகளின் விருப்பங்களை காங்கிரஸ் அவமதித்துள்ளது.
காங்கிரஸ் கட்சியில் சோனியா காந்தி இணைந்த அதே ஆண்டில், மத்தியில் ஆட்சியில் இருந்த 3ஆவது அணி-காங்கிரஸ் அரசு', பதவி உயர்வில் இட ஒதுக்கீடுகள் அளிக்க எதிர்ப்பு தெரிவித்ததும், காங்கிரஸ் தலைவராக ராகுல் காந்தி பதவியேற்ற ஆண்டில், வலுவான எஸ்.சி., எஸ்.டி. சட்டம் மற்றும் ஒபிசி ஆணையத்துக்கு எதிர்ப்பு தெரிவித்ததும் தற்செயலாகவா நடந்தது? இதிலிருந்து காங்கிரஸின் பிற்படுத்தப்பட்டோருக்கு எதிரான மனோபாவம் வெளிச்சத்துக்கு வருகிறது.
ராகுல் காந்தியிடம் நேர்மையையும், பகுத்தறிவையும் எதிர்பார்ப்பது கஷ்டம்தான். மண்டல் விவகாரம் குறித்து ராஜீவ் காந்தி பேசியதை படித்து பார்த்தால், அந்த ஆணையத்தின் பரிந்துரைகளை அவர் முழுவதும் எதிர்த்தது தெரியும். 
அதில், பிற்படுத்தப்பட்ட சமூகத்தினர் மீதான வெறுப்பும், பிறர் மீது ஆதிக்கம் செலுத்தும் எண்ணமும் வெளிப்பட்டுள்ளது. 
ஆனால், தற்போது நீங்கள் தலித் நலன் குறித்து பேசுகிறீர்கள் என்று அந்தப் பதிவுகளில் அமித் ஷா குறிப்பிட்டுள்ளார்.