ரூ.12,000 கோடி ஐஜிஎஸ்டியை பகிர நடவடிக்கை

புது தில்லி:  ஒருங்கிணைந்த சரக்கு-சேவை வரியாக (ஐஜிஎஸ்டி) வசூலாகியுள்ள ரூ.12,000 கோடியை பகிர்ந்து கொள்ள மத்திய, மாநில அரசுகள் முடிவு செய்துள்ளன.
இதில் ரூ.6,000 கோடியை மத்திய அரசு எடுத்துக் கொண்டு, மீதமுள்ள ரூ.6,000 கோடி அந்தந்த மாநிலங்களின் ஆகஸ்ட் மாத வரி வசூலிப்புக்கு ஏற்ப பிரித்துக் கொடுக்கப்பட இருக்கிறது. ஜிஎஸ்டி வரி அமல்படுத்தப்பட்ட பிறகு இப்போது மூன்றாவது முறையாக ஐஜிஎஸ்டி பகிரப்படுகிறது. இதற்கு முன்பு கடந்த ஜூன் மாதம் ரூ.50,000 கோடி ஐஜிஎஸ்டி மத்திய, மாநில அரசுகள் இடையே பகிரப்பட்டன. அதற்கு முன்பு பிப்ரவரியில் ரூ.35,000 கோடி வரி பகிரப்பட்டது.
ஐஜிஎஸ்டி வசூல் தொடர்ந்து குறைந்து வருகிறது. தொழில் நிறுவனங்கள் குறிப்பிட்ட காலத்தில் வரிக் கணக்கை தாக்கல் செய்து, வரியைச் செலுத்துவதால், அவர்களுக்கு வரிப் பிடித்தம் திரும்பி அளிக்கப்படுகிறது. இதனால்தான் ஐஜிஎஸ்டி வசூல் குறைகிறது என்று அதிகாரிகள் தெரிவித்துள்ளனர்.
ஜிஎஸ்டி வரி விதிப்பின்கீழ் நுகர் பொருள்கள் மற்றும் சேவைகளுக்கு மத்திய (சி) ஜிஎஸ்டி, மாநில (எஸ்) ஜிஎஸ்டி ஆகியவை வசூலிக்கப்பட்டு வரி வருவாய் மத்திய, மாநில அரசுகள் இடையே சமமாக பகிர்ந்து கொள்ளப்படுகின்றன. இறக்குமதிப் பொருள்கள், ஒரு மாநிலத்தில் உற்பத்தி செய்யப்பட்டு மற்ற மாநிலங்களில் விற்பனை செய்யப்படும் பொருள்களுக்கு ஐஜிஎஸ்டி விதிக்கப்படுகிறது. இது ஒட்டுமொத்தமாக மத்திய அரசால் வசூலிக்கப்பட்டு, பிறகு மாநிலங்களுக்கு பகிர்ந்தளிக்கப்படுகிறது.