ராஜஸ்தானில் ரூ.2 லட்சம் வரையிலான விவசாய கடன் தள்ளுபடி: முதல்வர் அசோக் கெலாட் அறிவிப்பு

ராஜஸ்தானில் ரூ.2 லட்சம் வரையிலான விவசாய கடன் தள்ளுபடி செய்யப்படுவதாக அந்த மாநில முதல்வர் அசோக் கெலாட் புதன்கிழமை அறிவித்துள்ளார்.
ராஜஸ்தான் சட்டப்பேரவைக்கு நடைபெற்ற தேர்தலில் காங்கிரஸ் கட்சி வெற்றி பெற்றது. இதைத் தொடர்ந்து, ராஜஸ்தான் முதல்வராக அக்கட்சியின் மூத்த தலைவர் அசோக் கெலாட் கடந்த 2 நாள்களுக்கு முன்பு பதவியேற்றார்.
இந்நிலையில், தலைமை செயலகத்துக்கு சென்று முதல்வர் பொறுப்பை கெலாட் புதன்கிழமை ஏற்றார். பின்னர் உயரதிகாரிகளுடன் அவர் ஆலோசனை நடத்தினார். இதன்பின்னர், ராஜஸ்தான் ஆளுநர் கல்யாண் சிங்கையும் அவர் சந்தித்துப் பேசினார்.
இதைத் தொடர்ந்து, ராஜஸ்தானில் ரூ.2 லட்சம் வரையிலும் விவசாயிகள் வாங்கிய கடன் தள்ளுபடி செய்யப்படுவதாக அவர் அறிவித்தார். இதுகுறித்து அவர் கூறுகையில், கூட்டுறவு வங்கிகளில் விவசாயிகள் வாங்கிய குறுகிய கால கடன், பிற வங்கிகளில் விவசாயிகள் வாங்கிய ரூ.2 லட்சம் வரையிலான கடன் தள்ளுபடி செய்யப்படுகிறது. இந்த கடன் தள்ளுபடியால், அரசுக்கு ரூ.18,000 கோடி செலவாகும். கடந்த நவம்பர் மாதம் 30ஆம் தேதி வரை கடன் வாங்கிய விவசாயிகள் அனைவரும் இதன் பயனை பெறுவர் என்றார்.
முன்னதாக, மத்தியப் பிரதேசம், சத்தீஸ்கர், ராஜஸ்தான் உள்ளிட்ட 5 மாநில சட்டப்பேரவைகளுக்கு நடைபெற்ற தேர்தலின்போது பிரசாரம் செய்த காங்கிரஸ் தலைவர் ராகுல் காந்தி, காங்கிரஸ் ஆட்சிக்கு வந்தால் 10 நாள்களில் விவசாய கடன் தள்ளுபடி செய்யப்படும் என்று அறிவித்திருந்தார்.
அதன்படி, மத்தியப் பிரதேச முதல்வராக பதவியேற்ற பிறகு விவசாய கடன் தள்ளுபடி தொடர்பான கோப்பில்தான் கமல்நாத் முதல் கையெழுத்திட்டார். சத்தீஸ்கர் முதல்வர் பூபேஷ் பகேலும் விவசாய கடன் தள்ளுபடி தொடர்பான அறிவிப்பை வெளியிட்டுள்ளார்.
இதைத் தொடர்ந்து, அஸ்ஸாமை ஆளும் பாஜக அரசு, விவசாய கடன் தள்ளுபடி தொடர்பான அறிவிப்பை செவ்வாய்க்கிழமை வெளியிட்டது. மேலும், குஜராத்தை ஆளும் பாஜக அரசும், கிராமப்புறங்களில் விவசாயிகள் உள்ளிட்டோரால் பாக்கி வைக்கப்பட்டிருந்த மின் கட்டணம் தள்ளுபடி செய்யப்படுவதாக செவ்வாய்க்கிழமை அறிவித்தது.