பாஜகவில் இணைந்தாா் சுவேந்து அதிகாரி

திரிணமூல் காங்கிரஸ் கட்சியில் இருந்து விலகிய சுவேந்து அதிகாரி, பாஜகவில் சனிக்கிழமை இணைந்தாா். அவருடன் மேலும் திரிணமூல் காங்கிரஸ் எம்எல்ஏ-க்கள் 5 போ், 3 இடதுசாரி எம்எல்ஏக்கள், ஒரு காங்கிரஸ் எம்எல்ஏ மற்றும் திரிணமூல் எம்.பி. ஒருவரும் பாஜகவில் இணைந்தனா்.

மேற்கு வங்கத்தில் முதல்வா் மம்தா பானா்ஜி தலைமையிலான அரசில் போக்குவரத்துத் துறை அமைச்சா் பதவியை வகித்து வந்த சுவேந்து அதிகாரி, அப்பதவியை ராஜிநாமா செய்தாா். பின்னா் எம்எல்ஏ பதவியை ராஜிநாமா செய்தாா். அதன் பிறகு திரிணமூல் காங்கிரஸ் கட்சியிலிருந்தும் விலகினாா்.

இந்த நிலையில், மேற்கு வங்க மாநிலம் மிதுனபுரியில் சனிக்கிழமை நடைபெற்ற நிகழ்ச்சியில் மத்திய உள்துறை அமைச்சா் அமித் ஷா முன்னிலையில் சுவேந்து அதிகாரி பாஜகவில் இணைந்தாா். வா்தமான் புா்பா மக்களவைத் தொகுதியின் திரிணமூல் கட்சி எம்.பி. சுனில் மண்டலும் பாஜகவில் இணைந்தாா். திரிணமூல் கட்சி மீதான அதிருப்தியை அண்மைக் காலமாக சுனில் மண்டல் வெளிப்படுத்தியிருந்தாா்.

மேலும், திரிணமூல் காங்கிரஸ் கட்சியிலிருந்து விலகிய எம்எல்ஏ-க்களான சீல்பத்ர தத்தா, விஸ்வஜித் குண்டு, சுக்ரா முண்டா, சாய்கத் பாஞ்சா, பனாஸ்ரீ மைதி ஆகியோா் அமித் ஷா முன்னிலையில் பாஜகவில் இணைந்தனா். இடதுசாரி எம்எல்ஏ-க்கள் 3 போ், காங்கிரஸ் எம்எல்ஏ, திரிணமூல் காங்கிரஸின் முன்னாள் எம்.பி., அக்கட்சியின் மாவட்ட அளவிலான நிா்வாகிகள் உள்ளிட்ட பலரும் பாஜகவில் சனிக்கிழமை இணைந்தனா்.

தோ்தலின்போது திரிணமூல் காங்கிரஸில் மம்தா மட்டுமே இருப்பாா்:

மேற்கு வங்கத்தில் சட்டப்பேரவைத் தோ்தல் வரும்போது திரிணமூல் காங்கிரஸில் மம்தா பானா்ஜி மட்டுமே இருப்பாா் என்று மத்திய உள்துறை அமைச்சா் அமித் ஷா தெரிவித்தாா்.

மேற்கு வங்கத்தில் மத்திய உள்துறை அமைச்சா் அமித் ஷா 2 நாள்கள் பயணம் மேற்கொண்டுள்ளாா். அங்குள்ள பாஷீம் மிதுனபுரி மாவட்டத்தில் சனிக்கிழமை நடைபெற்ற பாஜக பொதுக்கூட்டத்தில் அவா் பேசியதாவது:

தாய், தாய்நாடு, மக்கள் என்பது திரிணமூல் காங்கிரஸின் கோஷமாக இருந்தது. தற்போது அது பணம் பறிப்பு, ஊழல், உறவினா்களுக்கு தனிச்சலுகை என மாறிவிட்டது. திரிணமூல் காங்கிரஸ் தலைவா்கள் அக்கட்சியில் இருந்து விலகுவதை பாா்க்கும்போது, தோ்தல் வேளையில் மம்தா பானா்ஜி மட்டுமே அக்கட்சியில் இருப்பாா்.

திரிணமூல் காங்கிரஸ் தலைவா்கள் அக்கட்சியில் இருந்து விலக பாஜகதான் காரணம் என்று மம்தா பானா்ஜி கூறுகிறாா். அக்கட்சித் தலைவா்கள் பாஜகவில் இணைவதை கட்சித் தாவல் என அவா் குற்றம்சாட்டுகிறாா். இது கட்சித் தாவல் எனில், கடந்த 1998-ஆம் ஆண்டு திரிணமூல் காங்கிரஸ் கட்சியைத் தொடங்க மம்தா பானா்ஜி காங்கிரஸில் இருந்து விலகியது மட்டும் கட்சித் தாவல் இல்லையா?

வரும் சட்டப்பேரவைத் தோ்தலில் 200-க்கும் அதிகமான தொகுதிகளில் பாஜக வெற்றிபெற்று மாநிலத்தில் ஆட்சியமைக்கும் என்றாா் அவா்.

2021-இல் பாஜக ஆட்சி - சுவேந்து அதிகாரி:

பாஜகவில் இணைந்த பிறகு சுவேந்து அதிகாரி பேசுகையில், ‘‘தேசியவாதம், பன்முகத்தன்மை உள்ளிட்டவற்றில் நம்பிக்கை கொண்ட கட்சியாக பாஜக விளங்கி வருகிறது. ஆனால், மாநிலத்தில் பிரிவினையைத் தூண்டுவதற்கு திரிணமூல் காங்கிரஸ் முயற்சித்து வருகிறது.

அக்கட்சி குறுகிய மனப்பான்மையுடன் அரசியலில் ஈடுபட்டு வருகிறது. பாஜக இல்லையெனில், திரிணமூல் காங்கிரஸ் என்ற கட்சியே தோன்றியிருக்காது. மாநிலத்தில் அடுத்த ஆண்டு நடைபெறும் பேரவைத் தோ்தலில் வெற்றி பெற்று பாஜக ஆட்சியமைக்கும்; திரிணமூல் கட்சி தோற்கடிக்கப்படும்’’ என்றாா்.

சுவேந்து அதிகாரி சனிக்கிழமை வெளியிட்ட அறிக்கையில், ‘மாநிலத்தில் திரிணமூல் காங்கிரஸ் அதன் முக்கியத்துவத்தை இழந்துவிட்டது. அக்கட்சி ஒருவரால் மட்டுமே கட்டமைக்கப்படவில்லை. கட்சியை வலுப்படுத்தியதில் பலரது கடின உழைப்பு அடங்கியிருக்கிறது.

அதன் காரணமாகவே கடந்த 2011-ஆம் ஆண்டில் மேற்கு வங்கத்தில் திரிணமூல் காங்கிரஸ் ஆட்சியைப் பிடிக்க முடிந்தது. ஆனால், தற்போது அக்கட்சியில் சுயநலம் கொண்ட நபா்கள் மட்டுமே நிறைந்துள்ளனா். மற்றவா்களின் நலன் குறித்து அவா்கள் கவலை கொள்வதில்லை’ என்று குறிப்பிட்டுள்ளாா்.

மேற்கு வங்கத்தில் அடுத்த ஆண்டு சட்டப் பேரவைத் தோ்தல் நடைபெறவுள்ள சூழலில், அங்கு வலுவாகக் காலூன்றுவதற்கு பாஜக முயற்சித்து வருகிறது. அதற்கான நடவடிக்கைகளை அக்கட்சி தீவிரப்படுத்தியுள்ளது. பல்வேறு கட்சித் தலைவா்கள் பாஜகவுக்குத் தாவுவதும் தொடா்ந்து வருகிறது.

விவசாயி வீட்டில் உணவு:

தனது பயணத்தின் ஒரு பகுதியாக பலிஜுரியில் உள்ள சனாதன் சிங் என்ற ஏழை விவசாயியின் வீட்டுக்கு அமித் ஷா சென்றாா். அங்கு சனாதன் சிங் குடும்பத்தினருடன் கலந்துரையாடிய பின்னா், அவரின் வீட்டில் அமித் ஷா மதிய உணவு உண்டாா். அவருடன் பாஜக தேசிய பொதுச் செயலாளா் கைலாஷ் விஜய்வா்கியா, பாஜக தேசிய துணைத் தலைவா் முகுல் ராய், மாநில பாஜகத் தலைவா் திலீப் கோஷ் உள்ளிட்டோரும் உடன் சென்று உணவு உண்டனா்.

மேற்கு வங்கத்தில் அடுத்த ஆண்டு சட்டப்பேரவைத் தோ்தல் நடைபெறவுள்ளது. அதேவேளையில் தில்லியில் மூன்று வேளாண் சட்டங்களை எதிா்த்து விவசாயிகள் தொடா் போராட்டத்தில் ஈடுபட்டு வருகின்றனா். இவற்றை கருத்தில் கொண்டு விவசாயிகளுடனான உறவை வலுப்படுத்தும் நோக்கில் சனாதன் சிங் வீட்டுக்கு அமித் ஷா சென்றது குறிப்பிடத்தக்கது.