கரோனா வைரஸ்: விமானத்தில் தனியாளாக பயணித்து சென்னை வந்த பெண்

சென்னை: கரோனா வைரஸ் பாதித்த சீனாவில் இருந்து சிங்கப்பூர் வந்து அங்கிருந்து சென்னை திரும்பியிருக்கிறார் மருத்துவக் கல்லூரி மாணவி வேலம்.

சீனாவில் மட்டுமல்லாமல், உலக நாடுகள் முழுவதையும் அச்சுறுத்தலுக்கு ஆளாக்கியிருக்கிறது கரோனா வைரஸ்.  ஒரு வேளை யாராவது தொடர்ந்து தும்மினால் கூட அவர்களுக்கு கரோனா பாதிப்பு இருக்கக் கூடுமோ என்று அச்சப்படும் நிலைக்கு மக்கள் தள்ளப்பட்டுள்ளனர்.

இந்த நிலையில்தான் சீனாவின் தியான்ஜின் மருத்துவப் பல்கலைக்கழகம் மற்றும் கல்லூரியில் ஐந்தாம் ஆண்டு மாணவியான வேலம் சீனாவில் இருந்து சிங்கப்பூர் வழியாக சென்னை திரும்பியுள்ளார்.

வூஹான் நகரில் இருந்து சுமார் 1000 கி.மீ. தொலைவில் அமைந்துள்ளது தியான்ஜின். அங்கிருந்து சென்னை திரும்பிய வேலம் நமது எக்ஸ்பிரஸ் நிரூபரிடம் பேசுகையில், கரோனா வைரஸ் பாதிப்பு அச்சம் காரணமாக சாலைகளில் கூட ஒரு சிலர்தான் நடமாடினார்கள். 

சில கடைகள் மட்டுமே திறந்திருக்கின்றன. அந்த கடைகளிலும், மாஸ்க் அணிந்து கொண்டு உள்ளே வரவும் என்று எழுதப்பட்டிருக்கும். நாங்கள் தங்கியிருந்த விடுதி நிர்வாகம் தினமும் எங்களது உடல்வெப்ப நிலைய பரிசோதித்து தினமும் ஒரு மாஸ்க் கொடுக்கும்.

தற்போது விடுதியில் தங்கியிருந்த அனைத்து மாணவர்களும் சென்றுவிட்டனர். ஆப்ரிக்கா, நேபாளம் மற்றும் இரண்டு இந்திய மாணவர்களைத் தவிர என்று கூறியுள்ளார்.

வேலம் தியான்ஜின் நகரில் இருந்து சிங்கப்பூருக்கு விமானத்தில் தனி ஒரு பயணியாக வந்துள்ளார். கரோனா வைரஸ் பாதிப்பு காரணமாக விமானத்தில் யாருமே இல்லை. ஆனால் சிங்கப்பூரில் இருந்து சென்னைக்கு விமானம் முழுக்க ஆட்கள் நிரம்பி வழிந்தனர் என்கிறார் வேலம்.

முன்னெச்சரிக்கை நடவடிக்கையாக வேலம் சீனா, சிங்கப்பூர், சென்னை விமான நிலையங்களில் கடுமையான மருத்துவப் பரிசோதனைக்கு உட்படுத்தப்பட்டார். கடும் மன உளைச்சலில் இருந்ததாகவும், சென்னை வந்தடைந்ததில் மகிழ்ச்சி என்றும் கூறுகிறார்.