கரோனா வேலையிழப்பு: சொந்த ஊர் திரும்பும் சிங்கப்பூர் வாழ் இந்தியத் தொழிலாளர்கள்

கரோனா தொற்றுப் பரவலால் ஏற்பட்ட தொழில் முடக்கத்தால் வேலைவாய்ப்பை இழந்த இந்தியத் தொழிலாளர்கள் பலர் சொந்த ஊர் நோக்கித் திரும்புவது அதிகரித்து வருவதாக தகவல்கள் வெளியாகியுள்ளன.

கரோனா தொற்றுப் பரவல் காரணமாக கடந்த மார்ச் மாதம் உலகளாவிய அவசர நிலை அறிவிக்கப்பட்டது. அதன்படி உலக நாடுகள் பலவும் பொதுமுடக்கத்தை அறிவித்தன. இதனால் வழக்கமான தொழில் நடவடிக்கைகள் எதுவும் நடைபெறாமல் பலரும் பாதிக்கப்பட்டனர்.

இடம்பெயர் தொழிலாளர்கள் பலரும் தொழில் நிறுவனங்கள் மூடப்பட்டதால் தங்களது வேலை வாய்ப்புகளை இழந்தனர். இதனால் தங்களின் அன்றாட வாழ்க்கையை நகர்த்த முடியாமல் சொந்த ஊர் நோக்கி திரும்பினர்.

அந்த வகையில் சிங்கப்பூரில் பணி நிமித்தமாக இருந்த இந்தியர்கள் பலர் தங்களது வேலையிழப்பு காரணமாக சொந்த ஊர் செல்ல விண்ணப்பிப்பது அதிகரித்து வருவதாக சிங்கப்பூர் நாட்டிற்கான இந்தியத் தூதர் குமரன் தெரிவித்துள்ளார்.

அவர் பேசும் போது,  “நாளொன்றுக்கு சராசரியாக 100 பேர் வரை சொந்த ஊருக்குத் திரும்ப விண்ணப்பித்து வருகின்றனர். இதுவரை கிட்டத்தட்ட 11 ஆயிரம் பேர் விண்ணப்பித்துள்ளனர்.” எனத் தெரிவித்துள்ளார்.

மேலும், “வந்தே பாரத் திட்டத்தின்படி சிங்கப்பூர் மற்றும் இந்தியா இடையே போதுமான  விமானங்களை உறுதி செய்ய உயர் ஆணையம் தொடர்ந்து செயல்படும்.” என்று குமரன் கூறினார்.