சட்டம் ஒழுங்கைப் பராமரிப்பதில் அதிமுக அரசு படுதோல்வியடைந்துவிட்டது: மு.க.ஸ்டாலின்

சட்டம் ஒழுங்கைப் பராமரிப்பதில் அதிமுக அரசு படுதோல்வியடைந்து பரிதாபமாக நிற்கிறது என திமுக தலைவர் மு.க.ஸ்டாலின் குற்றஞ்சாட்டியுள்ளார். 

இதுகுறித்து மு.க.ஸ்டாலின் வெளியிட்டுள்ள அறிக்கையில் கூறப்பட்டுள்ளதாவது: 

பொது அமைதியைக் காப்பதிலும், சட்டம் ஒழுங்கைப் பராமரிப்பதிலும் தமிழகம் திறம்படச் செயல்பட்டுள்ளது என்ற தமிழக அரசின் அறிக்கை 'பொய்' என தற்போது தேசியக் குற்ற ஆவணக் காப்பகம் வெளியிட்டுள்ள அறிக்கை நிரூபித்துள்ளது.

2017, 2018ம் ஆண்டுகளுக்குரிய ஆவணக் காப்பகத்தின் அறிக்கையை ஒப்பிட்டுப் பார்த்தால், சட்டம் ஒழுங்கைப் பராமரிப்பதில் அதிமுக அரசு எப்படி படுதோல்வியடைந்து பரிதாபமாக நிற்கிறது என்பது விளங்கும்.

இந்தியத் தண்டனைச் சட்டம் மற்றும் உள்ளூர், சிறப்புச் சட்டங்களின் அடிப்படையில் தமிழகத்தில் அதிமுக ஆட்சியின் அந்த இரண்டு ஆண்டுகளில் பதிவு செய்யப்பட்ட வழக்குகள் முறையே 4.20 லட்சம், 4.99 லட்சம் என்று உயர்ந்து விட்டன. குற்றச் செயல்களும் 18.61 சதவிகிதம் அதிகரித்துவிட்டன.

கொலைக் குற்றங்களில் சென்னையில் 11.69 சதவிகிதமும், கோவையில் 47.62 சதவிகிதமாகவும் அதிகரித்து மாநகரம் இரண்டிலும் மக்களுக்குப் பாதுகாப்பு இல்லை என்ற ஆபத்தான சூழலை அதிமுக ஆட்சி உருவாக்கியுள்ளது. பெண்களுக்கு எதிரான குற்றங்களில் கோவையில் 40.79 சதவிகிதமாகவும், சென்னையில் 18.54 சதவிகிதமாகவும் அதிகரித்து பெண்களுக்கும் பாதுகாப்பு இல்லாத மாநகரங்களாகச் சென்னையையும், கோயம்புத்தூரையும் மாற்றிக் காட்டியதுதான் அதிமுக ஆட்சியின் சாதனை. 

குழந்தைகளுக்கு எதிரான குற்றங்களைத் தடுக்க முடியாமல், அதிமுக ஆட்சி தடுமாறுகிறது என்பதைப் பகிரங்கப்படுத்தும் வகையில், தமிழ்நாட்டில் குழந்தைகளுக்கு எதிரான குற்றங்கள் 17.74 சதவீதம் உயர்ந்திருக்கிறது என்று சுட்டிக்காட்டப்பட்டிருக்கிறது. சென்னையில் மட்டும், குழந்தைகளுக்கு எதிரான குற்றங்கள் 211.24 சதவிகிதம் அதிகரித்துள்ளது' என்று குற்றஞ்சாட்டியுள்ளார். 

"ரவுடிகள் ராஜ்யத்திற்கு 'பெர்மிட்' வழங்கியுள்ள அராஜக ஆட்சி - கூவத்தூர் கொண்டாட்டத்தில் முதல்வரான திரு.பழனிசாமியின் ஆட்சி;

தமிழகப் பொருளாதாரம் - தொழில் வளர்ச்சி - மக்கள் பாதுகாப்பிற்கு மிகப்பெரிய சாபக்கேடு"

- கழக தலைவர் @mkstalin அவர்கள் அறிக்கை.

Link: https://t.co/dq2Q8D7Ssz pic.twitter.com/TezxABiJkj

— DMK (@arivalayam) September 6, 2020

செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...