எஸ்எஸ்எல்சி பொதுத்தோ்வு: மாணவா்களுக்கு நுழைவுச்சீட்டு அளிக்காமல் இழுத்தடிக்கக் கூடாது

எஸ்எஸ்எல்சி பொதுத்தோ்வு எழுதும் மாணவா்களுக்கு நுழைவுச் சீட்டுகளை அளிக்காமல் பள்ளிகள் இழுத்தடிக்கக்கூடாது என்று பள்ளிக்கல்வித்துறை சுற்றறிக்கை அனுப்பியுள்ளது.

இது குறித்து பள்ளிக்கல்வித்துறை ஆணையா் வி.அன்புக்குமாா் வெளியிட்டுள்ள சுற்றறிக்கையில் கூறியிருப்பதாவது:

கா்நாடக எஸ்.எஸ்.எல்.சி. பொதுத் தோ்வு ஜூலை 19, 22-ஆம் தேதிகளில் நடக்கவிருக்கிறது. இத்தோ்வுக்கு விண்ணப்பித்துள்ள மாணவா்களின் நுழைவுச் சீட்டுகளை ஜூன் 29-ஆம் தேதி முதல் தரவிறக்கம் செய்துகொள்ளும்படி பள்ளிக் கல்வித்துறையின் இணையதளத்தில் வெளியிடப்பட்டுள்ளது. சம்பந்தப்பட்ட பள்ளிகள் இணையதளத்தில் இருந்து நுழைவுச்சீட்டுகளை தரவிறக்கம் செய்து, சம்பந்தப்பட்ட மாணவா்களுக்கு அளிக்க கேட்டுக் கொள்ளப்பட்டுள்ளனா். இதை பள்ளிகள் சிறப்பாக செயல்படுத்தி வருகின்றன. ஆனால், ஒரு சில பள்ளிகளில் மாணவா்களுக்கு நுழைவுச்சீட்டு அளிக்காமல் இழுத்தடிக்கப்படுவதாக நாளிதழ்களில் செய்தி வெளியாகியுள்ளன.

தோ்வு எழுதுவதற்கு பதிவு செய்துள்ள அனைத்து மாணவா்களுக்கும் நுழைவுச்சீட்டு அளிக்க வேண்டியது அவசியமாகும். நுழைவுச்சீட்டு கேட்டு வரும் மாணவா்கள் அல்லது பெற்றோா்களுக்கு அதை உடனடியாக வழங்க நடவடிக்கை எடுக்க வேண்டும். இதில் ஏதாவது பிரச்னை எழுந்தால் உடனடியாக கா்நாடக மேல்நிலைக்கல்வி தோ்வு வாரியத்தை அணுகலாம். மாணவா்களுக்கு நுழைவுச்சீட்டு வழங்க தகுந்த நடவடிக்கைகளை எடுக்க சம்பந்தப்பட்டவா்கள் கேட்டுக்கொள்ளப்படுகிறாா்கள் என்று அவா் தெரிவித்துள்ளாா்.